 |
|
გიორგი ლაჭყეპიანი მედიცინის მეცნიერებათა დოქტორი, პროფესორი, ცენტრალური საუნივერსიტეტო კლინიკის ნერვულ სნეულებათა დეპარტამენტის ინტენსიური თერაპიის სამსახურის უფროსი.
გიორგი ლაჭყეპიანი დაიბადა 1954 წელს. 1970-1976 წწ. სწავლობდა თბილისის სახელმწიფო სამედიცინო უნივერსიტეტის სამკურნალო ფაკულტეტზე. 1978-1983 წწ. სწავლობდა სანკტ-პეტერბურგის პირველი სამედიცინო ინსტიტუტის ასპირანტურაში. 1983 წელს დაიცვა საკანდიდატო დისერტაცია თემაზე: ”ჰემოდილუცია იშემიური ინსულტის დროს”. 1999 წელს - სადოქტორო დისერტაცია თემაზე: ”ნერვული სისტემის დაზიანება სეფსისის დროს”. 1984 წლიდან 2006 წლამდე გიორგი ლაჭყეპიანი მუშაობდა თბილისის სახელმწიფო სამედიცინო უნივერსიტეტის ნერვულ სნეულებათა კათედრაზე: ასისტენტი – დოცენტი – პროფესორი. დღეს იგი მუშაობს ნ.ყიფშიძის სახ. ცენტრალური საუნივერსიტეტო კლინიკის (რესპუბლიკური საავადმყოფო) ნერვულ სნეულებათა დეპარტამენტში ინტენსიური თერაპიის სამსახურის უფროსი. გიორგი ლაჭყეპიანი არის 49 სამეცნიერო ნაშრომის ავტორი, სახელმძღვანელოს თანაავტორი. 1989-98 წლებში იგი იყო საქართველოს ექიმთა ასოციაციის პრეზიდენტი, ამჟამად - გამგეობის წევრი. გიორგი ლაჭყეპიანი აგრეთვე არის ბავშვთა ნევროლოგიის ასოციაციის წევრი, თბილისის ნევროლოგთა ასოციაციის გამგეობის თავჯდომარე. გიორგი ლაჭყეპიანი ქალაქ ატლანტას (აშშ, ჯორჯიის შტატი) საპატიო მოქალაქეა. დაჯილდოებულია მადლობის სერტიფიკატით აშშ-საქართველოს დედათა და ბავშვთა დახმარების ერთობლივ პროგრამაში მონაწილეობისთვის (1996წ.). |
