ბელგიელმა მკვლევარებმა აღმოაჩინეს გენი, რომელიც პასუხისმგებელია სმენის დაკარგვაზე მთელ რიგ პაციენტებში. ისინი ვარაუდობენ, რომ ეს აღმოჩენა მეცნიერებს ოტოსკლეროზის მკურნალობის ახალი გზების გამონახვაში შეუწყობს ხელს. ოტოსკლეროზი საკმაოდ გავრცელებული დაავადებაა და ის ყოველი 250 ადამიანიდან ერთს უვითარდება. მდგომარეობა გამოწვეულია შუა ყურში არსებული ძვლის პათოლოგიური ზრდით, რომელიც თავის მხრივ ხელს უშლის ბგერითი ტალღების გადასვლას შუა ყურიდან შიგნითა ყურში. კვლევის დეტალები მოხსენებულ იქნა ადამიანის გენეტიკის ევროპული საზოგადოების კონფერენციაზე.
მკვლევარები ფიქრობენ, რომ ოტოსკლეროზი გამოწვეულია გენეტიკური და გარემო ფაქტორების კომბინირებული მოქმედებით. ჩვეულებრივ მისი განვითარება იწყება 20-30 წლის ადამიანებში. სმენის დაკარგვა ვლინდება თანდათანობით. ბევრი ადამიანი აღმოაჩენს, რომ არ ესმის დაბალი ბგერები ან ჩურჩულით ნათქვამი სიტყვები, სხვა სიმპტომებია: თავბრუსხვევა და ხმაური ყურებში.
როგორც ანტვერპენის უნივერსიტეტის წარმომადგენელმა და კვლევის ხელმძღვანელმა, მელისა ტისმა (Melissa Thys) განაცხადა, კვლევის შედეგებმა შესაძლოა მომავალში მკურნალობის უფრო დახვეწილი მეთოდები მოგვცეს, თუმცა ამჟამად საუკეთესო გამოსავალი კვლავაც ქირურგიული ოპერაციაა.
მიუხედავად ამისა, არსებობს შემთხვევები, როდესაც ქირურგიული ჩარევა შედეგს ვერ იძლევა. ანტვერპენის უნივერსიტეტის მკვლევართა ჯგუფმა ორიენტირება მოახდინა გენზე, სახელად TGBF1. ცნობილია, რომ ეს გენი გარკვეულ როლს ასრულებს ყურის ემბრიონალური განვითარების დროს და ასევე აქტიურად მონაწილეობს ოტოსკლეროზული ძვლის ზრდაში. მათ გამოიყენეს SNP (single nucleotide polymorphism) ანალიზის ტექნიკა, რათა მოეხდინათ ზემოაღნიშნული გენის თუნდაც უმნიშვნელო ცვლილების აღმოჩენა და დაადგინეს, რომ ოტოსკლეროზის მქონე ბელგიელ და ჰოლანდიელ პაციენტებს ჰქონდათ TGBF1 გენის სპეციფიკური ვარიანტი. მსგავსი შედეგები აღმოჩნდა მეორე ანალიზის დროს, რომელიც ფრანგ პაციენტებზე ჩატარდა.
როგორც ქალბატონმა ტისმა განაცხადა, ისინი არიან პირველები ოტოსკლეროზის გამომწვევი გენის იდენტიფიცირებაში. მან ასევე დასძინა, რომ გენის უფრო აქტიური ვარიანტის შექმნა დაეხმარება ექიმებს ამ დაავადებისგან პაციენტების დაცვაში.
სმენადაქვეითებულთა საქველმოქმედო ორგანიზაციის (Charity RNID) წარმომადგენელმა, პროფ. კატრიონა კრომბიმ განაცხადა, რომ სმენის დაკარგვაზე პასუხისმგებელი გენის აღმოჩენა არის ძალზე მნიშვნელოვანი იმ ადამიანებისთვის, რომლებიც მუშაობენ ყრუ და სმენადაქვეითებულ ადამიანებში მდგომარეობის გასაუმჯობესებლად. მკვლევარები მალე დაიწყებენ იმ პროცესების შესწავლას, რომლებსაც TGBF1 გენი აკონტროლებს, რათა შექმნან ოტოსკლეროზის პრევენციის და მკურნალობის ახალი გზები.
http://www.bbc.co.uk
2007.06.18
