ჩრდილოეთ არიზონის უნივერსიტეტის მკვლევარებმა აღმოაჩინეს, რომ მუქი შოკოლადი ყავაზე ეფექტურია ფოკუსირებისა და კონცენტრირების უნარის გაძლიერებისთვის.

მეცნიერებმა ჩაატარეს კვლევა, რომელშიც 18-დან 25 წლამდე ასაკის 122 მოხალისე მონაწილეობდა. მათ აზროვნებისა და მეხსიერების ტესტები უტარდებოდათ. ერთდროულად მიმდინარეობდა ელექტროენცეფალოგრაფიული კვლევა, რომელიც ტვინის აქტივობას ავლენდა.

ექსპერიმენტის შედეგების მიხედვით აღმოჩნდა, რომ მუქი შოკოლადი, 60% კაკაოს შემცველობით, მონაწილეთა ყურადღების დონეს  საგრძნობლად ზრდიდა. საკონტროლო ჯგუფმა, რომელსაც შოკოლადი არ ეძლეოდა,  უფრო მოკრძალებული შედეგები აჩვენა.

აღსანიშნავია, რომ მუქ შოკოლადს ერთი გვერდითი ეფექტი აქვს - ის წნევის მატებას იწვევს. მკვლევარებმა მას დაამატეს L-თიანინი - მწვანე ჩაიში არსებული ამინომჟავა, რომელსაც დამამშვიდებელი და სისხლძარღვთა გამაფართოვებელი ეფექტი აქვს. ამან არტერიული წნევის მოწესრიგება უზრუნველყო.

როგორც მეცნიერები აღნიშნავენ, სტიმულირების აღნიშნული ეფექტით  მხოლოდ შავი შოკოლადი ხასიათდება, ხოლო რძიანს -ასეთი ეფექტი არ აქვს.