რესვერატროლი ნაერთია, რომელსაც შეიცავს ყურძენი, წითელი ღვინო და არაქისი. აღმოჩნდა, რომ რესვერატროლს შეუძლია ხელი შეუშალოს მეხსიერების ასაკობრივ დაქვეითებას. ეს დაადგინეს რეგენერაციული მედიცინის ინსტიტუტის მკვლევარებმა, იუწყება Zee News.

ცნობილია, რომ რესვერატროლი სასარგებლოა გულ-სისხლძარღვთა სისტემისთვის. როგორც ირკვევა, მას დადებითი გავლენა აქვს ასევე ჰიპოკამპზეც, ტვინის უბანზე, რომელსაც უკავშირდება ადამიანის მეხსიერება, სწავლის უნარი და განწყობა. სავარაუდოდ, რესვერატროლს შეუძლია გაუმკლავდეს ნეიროდეგენერაციულ დაავადებებს, როგორიცაა, მაგალითად, ალცჰეიმერის დაავადება.

რესვერატროლის სასწაულმოქმედ თვისებებზე მეცნიერები დიდი ხანია ლაპარაკობენ. ცნობილია, რომ იგი თავის ტვინისა და ყელის კიბოს განვითარების რისკს ამცირებს. ალკოჰოლის გადაჭარბებული  მოხმარება სხეულის უჯრედებს აზიანებს, ხოლო რესვერატროლი ამ დაზიანებული უჯრედებს, რომლებიც კიბოს განვითარების რისკს შეიცავს, ანადგურებს. გარდა ამისა, რესვერატროლი აკნეს გამომწვევი ბაქტერიების მოქმედებასაც აჩერებს.