უკანასკნელი ათი წლის მანძილზე გამოყენებული იყო ვაქცინების ვარგისიანობის დამდგენი 2 მილიარდი თერმომგრძნობიარე ინდიკატორი. ვაქცინების ვარგისიანობის მონიტორინგის (VVM) იმუნიზაციის პროგრამებში ჩართვის 10 წლისთავთან დაკავშირებით ჯანმრთელობის მსოფლიო ორგანიზაცია (ჯანმო) და UNICEF აკეთებენ ახალ ერთიან პოლიტიკურ განცხადებას იმუნიზაციის პროცესის გაუმჯობესების საქმეში VVM-ის როლის შესახებ.
VVM მარტივი საშუალებაა, რომელიც მკაფიოდ გვამცნობს ვაქცინის ტემპერატურული რეჟიმის დარღვევის შემთხვევას. ათ წელზე მეტია, რაც იგი გამოიყენება და საშუალებას იძლევა უფრო მეტი ბავშვისთვის უფრო მეტ ადგილას ხელმისაწვდომი გახდეს ვაქცინაცია. ეს ინდიკატორი დაბეჭდილია ვაქცინის ფლაკონის ეტიკეტზე ან მიმაგრებულია ფლაკონის ან ამპულის თავზე. მონიტორის შიდა კვადრატი გაკეთებულია თერმომგრძნობიარე მასალისგან, რომელიც ღია ფერისაა და ხდება მუქი სითბოს ზეგავლენით, რაც იმას ნიშნავს, რომ ვაქცინა აღარაა ეფექტური.
”ვაქცინების მოვლა დიდ მზრუნველობას მოითხოვს. ყველა ვაქცინა მგრძნობიარეა სითბოსადმი, ხოლო ზოგიერთი - სიცივისადმი. VVM საჭირო საშუალებაა ვაქცინაზე გადაჭარბებული ტემპერატურის მოქმედების დასადგენად, რაც ძალიან მნიშვნელოვანია იმუნიზაციის პროგრამის წარმატებისთვის,” ამბობს ჯანმო-ს ოჯახისა და საზოგადოების ჯანდაცვის საკითხების კლასტერის გენერალური დირექტორის თანაშემწე ქ-ნი დეიზი მეფიუბელუ (Daisy Mafubelu).
მაგალითისთვის, 2006 წლის მაისს ინდონეზიაში მომხდარმა მიწისძვრამ დააზიანა ინფრასტრუქტურის დიდი ნაწილი და ასევე ჯანდაცვის ცენტრებში გასაცივებელი საშუალებები. ჩვეულებრივ, გამთბარი ვაქცინები უნდა ჩამოწერილიყო. ამ შემთხვევაში კი ვაქცინების ფლაკონებზე მონიტორების გადამოწმებისას დადგინდა, რომ ეს ვაქცინები ვარგისია. მთლიანად, VVM-ის დამსახურებით სხვადასხვა ვაქცინების 50 000-მდე დოზა გადაურჩა განადგურებას.
ჯანმოსა და UNICEF-ის გათვლებით VVM-ის გამოყენება იწვევს სულ ცოტა 5მლნ. ამერიკული დოლარის ეკონომიას გლობალური ჯანდაცვისთვის. მომავალი ათი წლის მანძილზე VVM საშუალებას მისცემს ჯანდაცვის მუშაკებს ამოიცნონ უვარგისი ვაქცინის 230მლნ. დოზა.
VVM-ის კონცეფცია შემუშავდა 1979 წელს ჯანმოს მიერ, ხოლო დაფინანსდა - აშშ-ს საერთაშორისო განვითარების სააგენტოს მიერ. ამჟამად VVM-ით ვაქცინების ყველა მწარმოებელს უზრუნველყოფს თემპტაიმის კორპორაცია. 1996 წელს გაჩნდა პირველი ინდიკატორი პოლიომიელიტის ვაქცინის ფლაკონზე, რომელმაც უმნიშვნელოდ გააძვირა ფლაკონის ფასი.
ახალი WHO/UNICEF-ის ერთიანი პოლიტიკური განაცხადი მოუწოდებს ვაქცინების მწარმოებელ ყველა ქვეყანას, რომ ვაქცინების შესყიდვის შეთანხმებებში მინიმალურ მოთხოვნად ჩადებული იყოს ფლაკონებზე ვაქცინის ვარგისიანობის ინდიკატორის არსებობა. ასევე მოუწოდებენ ყველა დონორ სააგენტოებსა და ინტერნაციონალურ არასამთავრობო ორგანიზაციებს, რომ უფასო ვაქცინების ყოველი პარტიისთვის მინიმალურ-სტანდარტად მიღებული იყოს VVM-ის არსებობა.
http://www.who.int
2007.05.07
