1 დეკემბერს, 12:00 საათზე, კულტურის ცენტრში ”მუზა”, აშშ საერთაშორისო განვითარების სააგენტოს (USAID) მიერ დაფინანსებული ”საქართველოში აივ პრევენციის პროექტი” და  ორგანიზაცია “ახალი თაობა ახალი ინიციატივა” შიდსთან ბრძოლის მსოფლიო დღისადმი მიძღვნილ ფართომასშტაბიან ახალგაზრდულ ღონისძიებას გამართავს.

ღონისძიებას დაესწრებიან ქვეყნის საკოორდინაციო საბჭოს თავმჯდომარე სანდრა რულოვსი,  აშშ ელჩი საქართველოში რიჩარდ ნორლანდი, სპორტის და ახალგაზრდულ საქმეთა მინისტრი ლევან ყიფიანი და სხვა მაღალი რანგის სტუმრები საქართველოს მთავრობიდან, არასამთავრობო და საერთაშორისო ორგანიზაციებიდან.

შიდსთან ბრძოლის მსოფლიო დღისადმი მიძღვნილი ღონისძიება, რომელშიც საქართველოს მასშტაბით 300-მდე სკოლის მოსწავლე მიიღებს მონაწილეობას, მიზნად ისახავს ახალგაზრდების ცნობიერების ამაღლებას აივ ინფექციის შესახებ, საზოგადოებაში შიდსთან ასოცირებული სტიგმის შემცირებას  და ცხოვრების ჯანსაღი  წესის დამკვიდრების ხელშეწყობას.

ღონისძიების ფარგლებში დაგეგმილი აქტივობები მოიცავს  საგანმანათლებლო კამპანიის -”არჩევანი შენზეა” ფარგლებში მიმდინარე სხვადასხვა კონკურსში გამარჯვებულთა გამოვლენასა და დაჯილდოებას,  შიდსის მსოფლიო დღისადმი მიძღვნილი მარათონის ”მე ვირჩევ ცხოვრების ჯანსაღ წესს” ორგანიზებას და  საგანმანათლებლო ფილმის ჩვენებას.  პარალელურად მოეწყობა ცხოვრების ჯანსაღი წესის თემატიკაზე ჩატარებული ფოტოებისა და პოსტერების კონკურსის საუკეთესო ნამუშევრების გამოფენა.

ღონისძიების დასკვნით ნაწილში ახალგაზრდებს სიტყვით მიმართავენ საპატიო სტუმრები და კონკურსებში გამარჯვებულებს   დააჯილდოებენ სერტიფიკატებით და პრიზებით.