ადამიანები, რომლებიც კბილის რენტგენოდიაგნოსტიკას ხშირად მიმართავენ, მენინგიომის განვითარების საფრთხის წინაშე დგანან, აცხადებენ სპეციალისტები ჟურნალ  Cancer-ში. მენინგიომა კეთილთვისებიანი სიმსივნეა და ძირითადად ნელი ზრდით ხასიათდება, თუმცა შეიძლება შრომისუნარიანობის დაკარგვის მიზეზი გახდეს.
იელის უნივერსიტეტის მეცნიერმა ელიზაბეტ კლაუსმა დეტალურად გააანალიზა სიმსივნის განვითარების სტატისტიკა და სტომატოლოგებთან ვიზიტის სიხშირე. კვლევა ეყრდნობოდა 1433 პაციენტის მონაცემებს, რომელთაც სიმსივნე 20-79 წლის ასაკში გამოუვლინდათ. საკონტროლო ჯგუფი მოიცავდა 1350 ადამიანს სიმსივნის გარეშე.
აღმოჩნდა, რომ კბილების ყოველწლიური სკანირება, რომელიც კბილებს შორის ფირის მჭიდროდ მოჭერას გულისხმობდა, შესაბამის რისკს 1,4-1,9-ჯერ ზრდიდა, ხოლო ყველა კბილის ერთიანი სურათი - 2,7-3-ჯერ და ეს მაშინ, როდესაც თანამედროვე დიაგნოსტიკა დასხივების მხოლოდ მინიმალურ დოზებს იყენებს.
ექსპერტები სტომატოლოგებს ურჩევენ, გადახედონ მათ დამოკიდებულებას რენტგენოდიაგნოსტიკის მიმართ და მისი გამოყენება მხოლოდ აუცილებლობით იყოს განსაზღვრული.