საქართველოს პარლამენტის თავმჯდომარის მოადგილემ გიორგი წერეთელმა ათასწლეულის განვითარების მიზნების საპარლამენტო ჯგუფის, პარლამენტის ჯანმრთელობის დაცვისა და სოციალურ საკითხთა კომიტეტის, გაეროს მოსახლეობის ფონდის (UNFPA), გაეროს შიდსის პროგრამის (UNAIDS) თანამშრომლობით, გაეროს ერთობლივი პროექტის ფარგლებში გამართული სემინარი გახსნა. სემინარი აივ/ინფექციისა და შიდსის თემატიკას განიხილავდა და პარლამენტის წევრებისა და პარლამენტის აპარატის თანამშრომლებისთვის იყო განკუთვნილი.

ვიცე–სპიკერმა გამოსვლაში ისაუბრა ათასწლეულის მიზნების მიღწევის მნიშვნელობაზე, აღნიშნა, რომ შიდსთან ბრძოლა ერთ-ერთი ყველაზე მნიშვნელოვანი გამოწვევაა თანამედროვე მსოფლიოსა და ჯანდაცვის სისტემისათვის. ამ კუთხით ძალზე მნიშვნელოვანია პარლამენტის წევრების, აპარატის თანამშრომლების ჩართულობა, ინფორმირებულობის გაზრდა რათა უფრო ეფექტურად მოხდეს აღნიშნული პრობლემის დაძლევა, და ზოგადად, ათასწლეულის განვითარების მიზნების მიღწევის ხელშეწყობა.

გიორგი წერეთელმა მადლობა გადაუხადა გაეროს სააგენტოებს სემინარის ორგანიზებისათვის. მნიშვნელოვანია, რომ მსგავსი სემინარები მომავალში კვლავ მოეწყობა ათასწლეულის განვითარების სხადასხვა მიზნების თემატიკაზე, რაც ხელს შეუწყობს ხელისუფლების მეტად ჩართულობასა და მობილიზებას MDG მიზნების მიღწევის პროცესში.