მეცნიერთა გუნდმა ლოს-ანჟელესის კალიფორნიის უნივერსიტეტიდან რონალდ მიცუიასუს ხელმძღვანელობით (Ronald T. Mitsuyasu) ჩაატარა კვლევა აივ-ინფექციის გენური თერაპიის შესახებ.

იმუნოდეფიციტური ვირუსის ერთ-ერთ ძირითად სამიზნეს Т-ლიმფოციტი წარმოადგენს. გამომწვევი უჯრედში იმ რეცეპტორის დახმარებით აღწევს, რომლის კოდირებასაც CCR5 გენი ახდენს. მკურნალობის ახალი მეთოდი დაფუძნებულია პაციენტის Т-ლიმფოციტებიდან ამ გენის მოცილებაზე და შემდეგ ავადმყოფის ორგანიზმში მისი იმუნური სისტემის მოდიფიცირებული უჯრედების ინექციით შეყვანაზე. მოდიფიკაციის პროცესში Т-ლიმფოციტების დაახლოებით მესამედი იღებს მუტირებული CCR5 გენის ორმაგ ასლს, რაც მათ მგრადობას უზრუნველყოფს აივ-ინფექციის მიმართ.

კვლევაში მონაწილეობდა 15 პაციენტი, რომლებსაც მოდიფიცირებული Т-ლიმფოციტების შეყვანიდან ერთი წლის განმავლობაში აკვირდებოდნენ. Т-ლიმფოციტების სტაბილური მატება სისხლის მოცულობით ერთეულზე დაუფიქსირდა ყველა მონაწილეს. გარდა ამისა, სამ მოხალისეს შეუმცირდა ვირუსული დატვირთვა (გამომწვევის რაოდენობა სისხლში), ხოლო ერთ პაციენტს ლაბორატორიული ანალიზით აივ-ინფექციის არსებობა აღარ დაუდასტურდა.

მიცუიასუს თქმით, ამ პაციენტს უკვე ჰქონდა მუტირებული CCR5 გენის ერთი ასლი და ამიტომ მკურნალობისას ამ ავადმყოფს იმუნოდეფიციტური ვირუსისადმი მდგრადი Т-ლიმფოციტების დაახლოებით ორჯერ მეტი რაოდენობა აღენიშნებოდა.

კვლევის შედეგების მიხედვით, მკურნალობის ახალი მეთოდი უსაფრთხოა. ნეგატიური გვერდითი მოვლენები არ იყო დაფიქსირებული. მოდიფიცირებული Т-ლიმფოციტები სისხლში, სულ მცირე, ერთ წლამდე მაინც რჩებოდა.

მკურნალობის ახალი მეთოდი შემუშავდა აივ-ინფიცირებული გერმანელი პაციენტის წყალობით, რომელიც გამოჯანმრთელდა ძვლის ტვინის გადანერგვის შემდეგ. ექიმებმა მას ისეთი დონორი შეურჩიეს, რომელიც CCR5 გენის მუტაციის მატარებელი იყო. ტრანსპლანტაციიდან სამი წლის შემდეგ მის ორგანიზმში აივ-ინფექციის არსებობა აღარ დაფიქსირდა.