მაკმასტერის უნივერსიტეტის თანამშრომელთა მტკიცებით, ფიზიკური ვარჯიშის შემდეგ წყურვილის მოსაკლავად ბავშვებს უნდა მისცენ რძე და არა წყალი, იტყობინება The Daily Mail. მათი აზრით, იგი უკეთესად უმკლავდება გაუწყლოებას წყალთან და სპორტულ სასმელებთან შედარებით.

კვლევის ხელმძღვანელი ბრაინ ტიმონზი ამბობს: “ვარჯიშის დროს ბავშვები კარგავენ წყალს, ხოლო ორგანიზმისთვის ძალზედ მნიშვნელოვანია სითხის საკმარისი რაოდენობით არსებობა. რძე პროტეინების, კალციუმის, ელექტროლიტებისა და ნახშირწყლების საუცხოო წყაროა. გარდა ამისა, იგი აღადგენს ოფლთან ერთად გამოყოფილი ნატრიუმის რაოდენობასაც”.

სხეულისთვის პროტეინის მიწოდება ვარჯიშის შუალედში ან დამთავრების დროს კუნთების განვითარებასა და ზრდას უწყობს ხელს. ასეთი ეფექტი სხვა სასმელს არ აღენიშნება. 8-10 წლის ბავშვების გამოკვლევამ აჩვენა, რომ რძის გამოყენებით შესაძლებელია სხეულში წყლის ნორმალური დონის შენარჩუნება. ამავე დროს, მკვლევარები აღნიშნავენ, რომ ვარჯიშის დროს, ჩვეულებრივ, ვერც მოზრდილები და ვერც ბავშვები ვერ ღებულობენ საკმარისი რაოდენობით სითხეს.

აღსანიშნავია, რომ 1%-ის ტოლფას გაუწყლოებას შეუძლია გამოიწვიოს ვარჯიშის პროდუქტიულობის 15%-ით დაქვეითება, გული რითმისა და შინაგანი ტემპერატურის მატება და ამტანობის შემცირება, ხოლო ძლიერი გაუწყლოების დროს შეიძლება სითბური დარტყმა განვითარდეს.