კოლუმბიის უნივერსიტეტის მეცნიერების მიერ ჩატარებული უკანასკნელი კვლევის მიხედვით, ძილის რეგულარული ნაკლებობა სერიოზულად ზრდის ზედმეტი წონის დაგროვების რისკს.
კვლევაში მონაწილეობდა 30-45 წლის 13 ქალი და 13 მამაკაცი. ყველა მათგანს კვლევის დასაწყისში ნორმალური წონა ჰქონდა, ხოლო ძილის ხანგრძლივობა 7-9 საათით განისაზღვრებოდა. კვლევა ორ ეტაპად ჩატარდა – თითოეული 6 დღის ხანგრძლივობით. პირველ ეტაპზე კვლევის მონაწილეებს ეძინათ 9 საათი, ხოლო მეორე ეტაპზე – მხოლოდ 4 საათი.
მათ არ აძლევდნენ დილით დაძინების უფლებას და ისინი იმყოფებოდნენ მუდმივი დაკვირვების ქვეშ. პირველი ოთხი დღის განმავლობაში მონაწილეები ერთნაირად იკვებებოდნენ სპეციალურად შემუშავებული რაციონის მიხედვით, ხოლო მეხუთე დღიდან მათ მიეცათ საშუალება ეჭამათ ყველაფერი, რასაც მოინდომებდნენ.
გაირკვა, რომ ძილის ნაკლებობის ფონზე ისინი მოიხმარდნენ უფრო მეტ კალორიებს:
ქალები – ყოველდღიურად 329 კალორიით, ხოლო მამაკაცები – 263 კალორიით მეტს. ამავე დროს, ქალები 31 გ-ით მეტ ცხიმს მიირთმევდნენ, ვიდრე ნორმალური ძილის დროს. მამაკაცებში ცხიმის მოხმარების მიხედვით ცვლილებები არ აღინიშნა.
გარდა ამისა, გამოუძინებელი მონაწილეებისთვის ყველაზე საყვარელი საჭმელი აღმოჩნდა ნაყინი, ხოლო მეორე ადგილი დაიკავა “სწრაფი კვების” საკვებმა.
მკვლევარები აღნიშნავენ, რომ ძილის ნაკლებობა მოქმედებს თავშეკავების უნარზე და აღნიშნულ მდგომარეობაში ადამიანები ვეღარ უმკლავდებიან ცხიმიანი საკვების ცდუნებას.
კვლევამ დაადასტურა კავშირი ძილსა და სიმსუქნეს შორის. მეცნიერთა თქმით, ადამიანების მიერ ძილის ნაკლებობის ფონზე გაკეთებული პროდუქტების არჩევანი ხელს უწყობს სიმსუქნისა და გულ-სისხლძარღვთა დაავადებების განვითარებას რისკის ზრდას.
აქედან გამომდინარე, ნორმალური წონის შენარჩუნებისათვის უნდა ეცადოთ მოიწესრიგოთ ძილი საჭირო ხანგრძლივობით.
http://Abbottgrowth.ru
2011.03.28
