ამერიკელმა მეცნიერებმა უკანასკნელი ოცი წლის მანძილზე მოწამვლის შესახებ არსებული სტატისტიკური მონაცემები გააანალიზეს.
რეიტინგში პირველი ადგილი ერგო ძეხვსა და სოსისს. როგორც აღნიშნავენ, ეს დაკავშირებულია იმასთან, რომ ხშირად ძეხვში ნატურალური ხორცის ჩანაცვლება ხდება სოიოს, სახამებლის, შემაერთებელი ქსოვილის, ქონის, ცხიმის, ტყავისა და «Е» კოდის მქონე დანამატის კოქტეილით.
მეორე ადგილზეა ზეთისხილი. განსაკუთრებული ყურადღებაა საჭირო შავი ზეთისხილის შეძენისას, რადგან ხშირად ჯერ კიდევ მწვანე ხილს რკინის გლუკონატით შავად ღებავენ. შეღებილი ზეთისხილის ბევრმა მოხმარებამ შეიძლება ორგანიზმში რკინის გადაჭარბებული რაოდენობით დაგროვება გამოიწვიოს.
კარტოფილიც, ასევე, საფრთხის შემცველია. ამ პროდუქტს პათოგენური მიკრობების მიზიდვის უნარი აქვს. აღნიშნული ეფექტი განსაკუთრებით ვლინდება მრავალი ინგრედიენტის შემცველ კერძებში – მაგალითად, სალათებში «ოლივიე», «მიმოზა» და სხვ.
ყველი პათოგენური ბაქტერიების შემცველი შეიძლება იყოს მისი არაპასტერიზებული რძისგან, განსაკურებით, სახლის პირობებში დამზადების შემთხვევაში.
ნაყინიც ფარული საფრთხეების შემცველია, რადგან ასაწონი ნაყინის შესანახი კონტეინერების გარეცხვა ხშირად არასათანადოდ ხდება. მათში სალმონელები, სტაფილოკოკები და ლისტერიები მრავლდება.
შებოლილ პროდუქტებში ბევრი კანცეროგენი და კონსერვანტია, ხოლო კვერცხები სახიფათოა ფრინველების გამო. სალმონელა ბინადრობს ცხოველების კუჭ-ნაწლავის ტრაქტში და ადამიანის ორგანიზმში კერძის არასათანადოდ დამუშავების შემთხვევაში ხვდება.
პომიდორი, ასევე, მოწამვლის არაიშვიათი მიზეზია, რადგან ბაქტერიები პომიდვრის დაზიანებული კანიდან აღწევენ. პომიდვრებში სალმონელებისა და ნოროვირუსების გამრავლება ხდება.
მწვანილი მოწამვლების რაოდენობით აბსოლუტურ ლიდერს წარმოადგენს. მავნე ბაქტერიებისა და ვირუსების მწვანილში შეღწევა მიწიდან ხდება და შემდეგ რჩება მცენარეებში.
მეცნიერები აღნიშნავენ, რომ ამ პროდუქტების ჭამა შეიძლება, მაგრამ მოხმარებისას განსაკუთრებული სიფრთხილეა საჭირო. აუცილებელია ხელების დაბანა და დანის გარეცხვა თითოეულ პროდუქტთან მუშაობის შემდეგ, ასევე, სხვადასხვა პროდუქტისთვის განსხვავებული საჭრელი დაფების გამოყენება. საჭიროა მწვანილის მინიმუმ 20 წუთით ჩალბობა და მერე გამდინარე წყალში გარეცხვა.
http://www.topnews.ru
2011.01.10
