აივ-ინფექციის ახალ ექსპერიმენტულ წამალს, სახელწოდებით VIR-576, შეუძლია ინფექციის ადრეულ სტადიაზე შეჩერება. მედიკამენტი შემუშავებულია პატარა კერძო კომპანიაში - VIRO Pharmaceuticals. კვლევებმა აჩვენა, რომ მედიკამენტი ვირუსის კონცენტრაციას სისხლში 95%-ით ამცირებს.
როგორც ირკვევა, წამალი ვირუსს იმუნურ უჯრედებზე მიმაგრების საშუალებას არ აძლევს. ულმას საუნივერსიტეტო ჰოსპიტლის მეცნიერი ფრანკ კირჰოფი აღნიშნავს, რომ აივ-ვირუსი, ნამდვილად, ახდენს ადამიანის უჯრედების მიმართულებით “ღუზის” მსგავსი მისამაგრებელი საშუალების გადასროლას. პრეპარატი სწორედ ამ “ღუზას” (მიერთებაზე პასუხისმგებელი პეპტიდი) უტევს, რის გამოც ვირუსი ვეღარ ახერხებს უჯრედის მემბრანის გავლას და შიგნით შეღწევას. ამრიგად, VIR-576 ვირუსის ბლოკირებას ახდენს ადრეულ ეტაპზე, რითაც იგი განსხვავდება სხვა მედიკამენტებისგან.
კირჰოფმა კოლეგებთან ერთად ჩაატარა წამლის ტესტირება. ექსპერიმენტში მონაწილეობდა 18 აივ-ინფიცირებული მოხალისე, რომელთაც 10 დღის განმავლობაში მკურნალობდნენ პრეპარატის სამი სხვადასხვა დოზით. წამლის შეყვანა ხდებოდა ინექციის საშუალებით. კვლევის არცერთი მონაწილე სხვა წამალს არ იღებდა და VIR-576 მათთვის პირველი ანტირეტროვირალური მედიკამენტი იყო. აღმოჩნდა, რომ ყველაზე დიდი დოზა (5 გრამი დღეში) სისხლში ვირუსის 95%-ით შემცირებას იწვევდა. ამავე დროს, მნიშვნელოვანი გვერდითი ეფექტები არ აღინიშნებოდა.
ცნობილია, რომ აივ-ვირუსი მიეკუთვნება ე.წ. “შემბოჭველი” ვირუსების ჯგუფს, რომელთა რიცხვში შედიან გრიპის, ყბა-ყურას, წითელას, В ჰეპატიტის, С ჰეპატიტის, ებოლის ცხელების და მძიმე მწვავე რესპირატორული სინდრომის გამომწვევი ვირუსები. ექიმები ვარაუდობენ, VIR-576-ის წარმატების შემთხვევაში ანალოგიურად იქნება შესაძლებელი ახალი მედიკამენტების შექმნა ზ.ა. ვირისებისთვისაც.
http://www.reuters.com
2010.12.24
