მიმდინარე წლის 1 დეკემბერს, სპორტის სასახლეში, USAID-ის მიერ დაფინანსებული "საქართველოში აივ პრევენციის პროექტის" მხარდაჭერით, გაიმართა საქართველოს საპატრიარქოსთან არსებული ახალგაზრდული მოძრაობა "დავითიანნის" მიერ ორგანიზებული, შიდსთან ბრძოლის საერთაშორისო დღისადმი მიძღვნილი კონცერტი, რომელიც მიზნად ისახავდა საზოგადოების, განსაკუთრებით კი მოსწავლე ახალგაზრდების, ცნობიერების ამაღლებას შიდსთან დაკავშირებული საკითხების შესახებ.
ღონისძიებას ესწრებოდა სრულიად საქართველოს კათოლიკოს-პატრიარქი ილია II, საქართველოს პარლამენტის ვიცე სპიკერი ბ-ნ გიგი წერეთელი, აშშ ელჩი საქართველოში ბ-ნი ჯონ ბასი და USAID-ის მისიის ხელმძღვანელი ბ-ნი ჯონათან მ. კონლი.
ღონისძიების ფარგლებში სხვადასხვა საკონცერტო ნომრებთან ერთად შესრულდა შიდსის საერთაშორისო დღისადმი მიძღვნილი ჰიმნი, ნაჩვენები იქნა შიდსის შესახებ საინფორმაციო ვიდეო კლიპები და მოხდა შიდსის პრევენციის პროგრამის წარდგენა. ასევე გაიმართა ცხოვრების ჯანსაღი წესის პროგრამაში მონაწილე 10 საუკეთესო სკოლის გამოვლენა და დაჯილდოება.
კონცერტის შემდეგ, მოეწყო მოსწავლე-ახალგაზრდების მსვლელობა სპორტის სასახლიდან სამების საკათედრო ტაძრამდე, სადაც ჩატარდა ჯანმრთელობის საყოველთაო პარაკლისი. მსვლელობისას ახალგაზრდებს დაურიგდათ 10,000 საინფორმაციო ბუკლეტი შიდსის თემატიკაზე.
"საქართველოში აივ პრევენციის პროექტი"
2010.12.02
