ახალი კვლევის მიხედვით, პრეპარატ Truvada-ს, რომელიც გამოიყენება აივ-ინფექციის სამკურნალოდ, ასევე, შეუძლია აივ-დაინფიცირების პრევენცია.
მეცნიერებმა დაადგინეს, რომ Truvada-ს ყოველდღიური მოხმარება დაახლოებით 73%-ით ამცირებს აივ-ვირუსით დაინფიცირების რისკს ჰომოსექსუალ და ბისექსუალურ მამაკაცებში.
ექსპერტთა თქმით, ეს აღმოჩენა უდიდესი მნიშვნელბისაა აივ/შიდსის წინააღმდეგ ბრძოლის საქმეში, თუმცა საინტერესოა, რამდენად ვრცელდება მიღებული შედეგები სხვა პოპულაციაზე: ნარკოტიკების ინტრავენურ მომხმარებლებსა და ქალების ინფექციისადმი მოწყვლად ნაწილზე.
IPrEx (pre-exposure initiative study) კვლევით პირველად მოხდა ანტირეტროვირალური სამკურნალო პრეპარატის პრევენციული უნარის დადგენა.
კვლევაში მონაწილეობდა 2 499 ადამიანი აშშ-დან, პერუდან, ეკვადორიდან, ბრაზილიიდან სამხრეთ აფრიკიდან და ტაილანდიდან, რომელთა რანდომიზებულად შერჩეულ ერთ ნაწილს ყოველდღიურად აძლევდნენ Truvada-ს და მეორე ნაწილს - პლაცებოს.
დაახლოებით 14 თვის შემდეგ Truvada-ს მომხმარებელთა ჯგუფში აღინიშნა აივ-ინფექციის 36 ახალი შემთხვევა, ხოლო პლაცებოს ჯგუფში – 64.
კვლევას ხელმძღვანელობდა დოქტორი რობერტ გრანტი (Robert Grant) სან-ფრანცისკოს კალიფორნიის უნივერსიტეტიდან. მისი თქმით, მთლიანობაში, Truvada-მ აივ-დაინფიცირების რისკი 44%-ით შეამცირა, თუმცა აღსანიშნავია, რომ, ბევრ შემთხვევაში მამაკაცები არღვევდნენ Truvada-ს ყოველდღიურად მიღების დადგენილ წესს. მამაკაცებს, რომლებიც 90% შემთხვევაში მედიკამენტს ყოველდღიურად ღებულობდნენ, აღენიშნათ დაინფიცირების 73%-ით შემცირება, ხოლო მათ, ვინც ზუსტად იცავდა კვლევის მიერ Truvada-ს მიღების დადგენილ წესს დაინფიცირების რისკი შეუმცირდათ 90%-ით.
კვლევის შედეგები გამოქვეყნდა ჟურნალში “The New England Journal of Medicine”.
Truvada ორი რეტროვირალური წამლის: Enofovir and Emtricitabine, კომბინირებულ ნაერთს წარმოადგენს. მას, ჩვეულებრივ, აივ-ინფექციის სამკურნალოდ გამოიყენებენ, ხელს უშლის რა ვირუსის რეპლიკაციისა და გავრცელების პროცესს.
http://www.independent.co.uk
2010.11.29
