ახალი კვლევის მიხედვით შიდსის გამომწვევი ვირუსი გენიტალურ ტრაქტში მოხვედრისას განიცდის ცვლილებებს, რის გამოც ვირუსი სისხლსა და სპერმაში განსხვავებულია.
მსოფლიოში აივ-ვირუსის გადაცემა ძირითადად სქესობრივი კონტაქტის შედეგად ხდება და შემთხვევათა უმრავლესობაში - მამაკაციდან ქალზე. ახალი აღმოჩენა განსაკუთრებით მნიშვნელოვანია, რადგან მამაკაცის გენიტალურ ტრაქტში არსებული ვირუსის ბუნება გადამწყვეტია გადაცემის პროცესისა და გადაცემაზე მოქმედი ფაქტორების გაგებისათვის და რაც მთავარია, ვირუსის მაბლოკირებელი ვაქცინისა და მედიკამენტის შემუშავებისათვის.
კვლევის ხელმძღვანელის რონალდ სუანსტრომის (Ronald Swanstrom) თქმით, თუ აქამდე აივ-ინფექციის შესახებ არსებული ინფორმაცია ეყრდნობოდა სისხლში მოცირკულირე ვირუსს, სპერმაში ვირუსის განსხვავებული სახით არსებობის დადგენა გამოიწვევს ვირუსის გადაცემასთან დაკავშირებული წარმოდგენის გადახედვას.
კვლევის პროცესში მეცნიერები აკვირდებოდნენ ვირუსულ პოპულაციებს ქრონიკული აივ1-ინფექციის მქონე 16 მამაკაცის სისხლსა და სპერმაში. ვირუსების განსხვავება ძალიან გამოხატული იყო.
კვლევის ავტორი აღნიშნავს, რომ სისხლში ვირუსის გენურ თანმიმდევრობაზე დაკვირვებისას ძნელად ვლინდებოდა მსგავსება, ეს იყო რთული და განსხვავებული პოპულაცია, ხოლო სპერმის შემთხვევაში, აღნიშნული თანმიმდევრობა იყო ერთნაირი. მისივე თქმით, სპერმაში ვირუსის განსხვავებული სახით არსებობის მიზეზის ახსნა ძალზედ მნიშვნელოვანია აივ-ინფექციის გადაცემის პროცესის სწორი გაგებისათვის და შესაბამისად, ამ ინფექციის ეფექტური მართვისათვის.
http://www.elements4health.com
2010.08.27
