მეცნიერებმა აღმოაჩინეს, რომ ღეროვან უჯრედებზე მოქმედებით ბროკოლს შეუძლია ძუძუს კიბოს გავრცელების შეჩერება.
მკვლევარებმა დაადგინეს, რომ ბროკოლის ერთ-ერთი კომპონენტი Sulforaphane ზემოქმედებს ღეროვან უჯრედებზე, იწვევს მათ განადგურებას და ამით ხელს უშლის სიმსივნის ზრდას და გავრცელებას.
კვლევის ავტორი მიჩიგანის უნივერსიტეტის პროფესორი დუქსინ სანი (Duxin Sun) ამბობს, რომ Sulforaphane-ის სიმსივნეზე ეფექტის შესწავლა ადრეც წარმოებდა, მაგრამ უკანასკნელმა კვლევამ აჩვენა მისი მნიშვნელობა ძუძუს კიბოს ღეროვანი უჯრედების ინჰიბირების პროცესში.
ახალი აღმოჩენის მიხედვით, Sulforaphane-ის ან ბროკოლის ექსტრაქტის პოტენცია სიმსივნის პრევენციასა და მკურნალობაში გულისხმობს მის ზემოქმედებას სიმსივნის ღეროვან უჯრედებზე.
თაგვებსა და უჯრედოვან კულტურებზე ჩატარებული კვლევა გამოქვეყნდა “Clinical Cancer Research”-ის მაისის გამოცემაში.
ამჟამინდელი ქიმიოთერაპია არ მოქმედებს კიბოს ღეროვან უჯრედებზე, რის გამოც ხდება კიბოს ხელახლა წარმოშობა და გავრცელება. მეცნიერებს სჯერათ, რომ ღეროვანი უჯრედების ელიმინაცია საკვანძო მნიშვნელობისაა კიბოს კონტროლისთვის.
მეცნიერებმა ძუძუს კიბოს მქონე თაგვებს შეუყვანეს ბროკოლის ექსტრაქტიდან მიღებული Sulforaphane-ის სხვადასხვა კონცენტრაცია და აკვირდებოდნენ ღეროვანი უჯრედების რაოდენობას. კვლევის შედეგების მიხედვით, Sulforaphane-ით მკურნალობის შემდეგ მნიშვნელოვნად შემცირდა ღეროვანი უჯრედების რაოდენობა, ხოლო ნორმალურ უჯრედებზე მცირე ეფექტი აღინიშნა. შემდგომში, Sulforaphane-ით ნამკურნალები უჯრედები კარგავენ ახალი სიმსივნეების გენერირების უნარს.
კვლევის ავტორების თქმით, ეს კვლევა გვთავაზობს პოტენციურად ახალ მკურნალობას და კომბინირებული იქნება იმ ნაერთებთან, რომელიც უზრუნველყოფს ძუძუს კიბოს ღეროვანი უჯრედებამდე მიღწევას.
კვლევის დროს გამოყენებული Sulforaphane-ის კონცენტრაცია უფრო მაღალი იყო, ვიდრე შესაძლებელია მისი მიღება ბროკოლის ჭამით. კიბოზე ზემოქმედებისთვის საჭირო კონცენტრაცია სხეულის მიერ აბსორბირებული უნდა იყოს ბროკოლის ექსტრაქტიდან. კვლევის დროს გვერდითი მოვლენები არ გამოვლინდა. რადგან ექსტრაქტი ხელმისაწვდომია კაფსულების ფორმით, კონცენტრაციები არარეგულარულია და შესაძლებელია მისი ცვლა.
მკვლევარები ამჟამად ამუშავებენ Sulforaphane-ის ექსტრაქტირებისა და შენახვის მეთოდს, რომელსაც გამოიყენებენ დაგეგმილ კლინიკურ კვლევაში, ძუძუს კიბოს პრევენციასა და მკურნალობაში მისი მნიშვნელობის უფრო ზუსტი განსაზღვრისათვის.
http://www.dailymail.co.uk
2010.05.05
