ყველასთვის ცნობილია, რომ ნიორი სასარგებლოა გულისა და სისხლძარღვებისათვის. აი, ბოლო მონაცემები: აღმოჩნდა, რომ სასარგებლოა მხოლოდ ცოცხალი - ახლახან დაჭყლეტილი ან გაჭრილი ნიორი.
მრავალი წლის მანძილზე ჩვენ გვასწავლიდნენ, რომ ნიორში მთავარი იყო ალიცინი, აქროლადი ნივთიერება, რომელიც წარმოიქმნება ნივრის კბილის გაჭრის მომენტში და დიდხანს ინახება მის წვენში. მაგრამ დოქტორი დიპაკ დასი კონექტიკუტის უნივერსიტეტის გულ-სისხლძარღვთა დაავადებების კვლევითი ცენტრიდან (აშშ) საქმეს სკურპულოზურად მიუდგა და აღმოაჩინა, რომ საქმე არა ალიცინში, არამედ მის ერთ-ერთ კომპონენტშია, კერძოდ კი ეს არის გოგირდწყალბადი. ეს აირი ცნობილია თავისი სპეციფიკური არასასიამოვნო სუნით (ლაყე კვერცხის ან დამპალი საკვები ნარჩენების სუნი). აღმოჩნდა, რომ ის იწვევს გლუვი კუნთების მოდუნებას, რომლითაც ამოფენილია სისხლძარღვების კედლები, რითაც ამცირებს მათ სპაზმს და ხელს უშლის ისეთ შესაძლო გამოსავალს, როგორიცაა ინსულტი და ინფარქტი.
კვლევა ჩატარდა ვირთხებზე, რომელთა ერთ ჯგუფს აჭმევდნენ ახლადდაჭრილ ნიორს, ხოლო მეორეს კი - გამხმარს. ამის შემდეგ ექსპერიმენტატორებმა მოახდინე ვირთხებში გულის შეტევის მოდელირება. ”უმი ნივრის მჭამელთა” ჯგუფში გულის კუნთი უფრო მალე აღდგა, ვიდრე ”გამხმარი ნივრის მჭამელებში”.
ამის გათვალისწინებით, გამხმარი ნივრისაგან დამზადებული ფართოდ რეკლამირებული აბები და ფხვნილები, მისი მწარმოებლების გულდასაწყვეტად, სულაც არ აღმოჩნდა სამკურნალო საშუალება. მეორეს მხრივ, ცოცხალი ნივრისაგან განსხვავებით, მათ სულაც არ აქვთ ის სპეციფიკური არასასიამოვნო სუნი, რაც აბრკოლებს ამ ბოსტნეულის მომხმარებლებს. იმედია, მომავალში მეცნიერები მოახერხებენ ნივრისაგან ისეთი სამკურნალო საშუალებების დამზადებას, რომელშიც შენარჩუნებული იქნება მისი ყველა სასარგებლო თვისება.
საინტერესოა, რომ გოგირდის სხვადასხვა სულფიდური შენაერთები, რომლის მაგალითადაც გვევლინება გოგირდწყალბადი, შედის ყველაფერში, რაც მძაფრ სურნელს ატარებს (მაგ. კომბოსტო), წვავს თვალებს (მაგ. ხახვი) და შუშხავს ენას (მაგ. პირშუშხა). ყველა ეს პროდუქტი ასევე სასარგებლოა ჩვენი ორგანიზმისათვის, კერძოდ გულ-სისხლძარღვთა სისტემისათვის.
http://www.inauka.ru
2010.04.27
