ახალი კვლევის მიხედვით, ბანანიდან მიღებული ქიმიური ნივთიერება, რომელიც აივ-ინფექციის მძლავრ ახალ ინჰიბიტორს წარმოადგენს, გზას უხსნის ახალი მეთოდის შემუშავებას აივ-ინფექციის სქესობრივი გადაცემის პრევენციისთვის.
მეცნიერების განსაკუთრებულ ინტერესს იპყრობს ლექტინები, მცენარეებში არსებული ბუნებრივი ქიმიკატები, რომლებიც ავლენენ უნარს შეაკავონ ის ჯაჭვური რეაქცია, რომელიც იწვევს სხვადასხვა ინფექციის განვითარებას.
ლაბორატორიულ პირობებში ბანანიდან გამოყვეს ლექტინი BanLec, რომელიც ხასიათდება იგივე ეფექტურობით, როგორითაც ამჟამად კლინიკურ გამოყენებაში მყოფი ორი ანტი-აივ მედიკამენტი. მკვლევართა განმარტებით, BanLec შეიძლება გახდეს პრაქტიკული ვაგინალური მიკრობიოციდების უფრო იაფი ახალი კომპონენტი.
აივ-ინფექციის გავრცელების შემაჩერებელი ახალი გზების გამონახვა სასიცოცხლო აუცილებლობაა. ახალი აივ-ინფექციების წილი ბევრად აღემატება ანტირეტროვირალური წამლების მიმღებ ახლად დაინფიცირებულთა წილს, ხოლო ეფექტური ვაქცინის მიღებას კი, როგორც ჩანს, საკმაო წლები გვაცილებს.
“აივ-ინფექცია ჯერ-ჯერობით ფართოდ გავრცელებადია აშშ-ში და განსაკუთრებით მძვინვარებს ღარიბ ქვეყნებში, იწვევს რა მზარდ პრობლემებს დაინფიცირებულთა უზარმაზარი რიცხვისა და მკურნალობასთან დაკავშირებული ხარჯების გამო ”, - ამბობს კვლევის ხელმძღვანელი დავიდ მარვოვიცი (David Marvovitz).
მიუხედავად იმისა, რომ პრეზერვატივების გამოყენება საკმაოდ ეფექტურია, თუ იგი გამოყენებულია მუდმივად და სწორად, ხშირია მისი უგულებელყოფის შემთხვევა. მარვოვიცის თქმით, სწორედ ამიტომ, ხანგრძლივი მოქმედების მიკრობიოციდების შემუშავების იდეა ძალიან მიმზიდველია.
ყველაზე იმედისმომცემ ნაერთს ვაგინალური და რექტალური აივ-გადაცემის ინჰიბირებისთვის წარმოადგენს ის აგენტი, რომელიც მოახდენს აივ-ინფექციის ბლოკირებას მის სამიზნე უჯრედში შეღწევამდე.
ლექტინები წარმოადგენს შაქრის შემბოჭველ პროტეინებს, რომელსაც შეუძლია ვირუსის მსგავსი უცხო სხეულის ამოცნობა და ამ პათოგენზე მიმაგრება.
მკვლევარების მიერ ბანანში აღმოჩენილ ლექტინ BanLec-ს შეუძლია აივ-ინფექციის ინჰიბირება შაქრით მდიდარი აივ-1 ვირუსის გარსის პროტეინის (gp120) შებოჭვით, რითიც ბლოკავს ვირუსის სხეულში შეჭრას.
კვლევის თანაავტორმა ერვინ ჯ.გოლდსტეინმა (Erwin J. Goldstein) შეიმუშავა ბანანიდან BanLec-ის იზოლაციის ბიორაფინირების მეთოდი. კვლევის შედეგებმა აჩვენა, რომ BanLec არის ეფექტური ანტი-აივ ლექტინი და სიძლიერით ამჟამად კლინიკურ ხმარებაში მყოფი ისეთი მედიკამენტების მსგავსია, როგორიცაა T-20 და Maraviroc.
მკვლევართა აზრით, BanLec-ის გამოყენებით უფრო გაიაფდება ანტიტრეტროვირალური მედიკამენტების წარმოება, რომელიც ამჟამად სინთეტიკურად მიღებულ კომპონენტებს იყენებს, გარდა ამისა, BanLec უზრუნველყოფს დაცვის უფრო ფართო სპექტრს.
მეცნიერები აღნიშნავენ, რომ აივ-მედიკამენტების ეფექტთან დაკავშირებული პრობლემები, რომლებიც მუტაციების დროს ვითარდება, ნაკლებად სავარაუდოა ლექტინების გამოყენების შემთხვევაში.
ლექტინებს შეუძლია შაქრის შებოჭვა აივ-1 გარსის სხვადასხვა უბანზე, ამიტომ, სხვადასხვა მუტაციის შემთხვევაში, სავარაუდოდ, იგი შეძლებს შეინარჩუნოს თავისი უნარი.
ავტორთა თქმით, აივ-ინფექციის წინააღმდეგ ბრძოლაში სულ მცირე წარმატებასაც კი შეუძლია მილიონობით სიცოცხლის გადარჩენა. მკვლევართა გამოთვლებით, მიკრობიოციტებით 20%-იანი მოცვა, მათი აივ-საწინააღმდეგო მხოლოდ 60%-იანი ეფექტურობის შემთხვევაშიც კი, გამოიწვევს აივ-ინფექციის 2,5 მლნ-მდე შემთხვევის პრევენციას სამი წლის განმავლობაში.
http://www.elements4health.com
2010.03.17
