ამერიკელი მეცნიერების მიერ ჩატარებული კვლევის მიხედვით, ავადმყოფი პარტნიორისაგან აივ-ინფექციით დაინფიცირების რისკი მნიშვნელოვნად მცირდება, თუ იგი იტარებს ადექვატურ ანტირეტროვირუსულ მკურნალობას. აქედან გამომდინარე, ანტირეტროვირუსული საშუალებების გამოყენება შეიძლება არა მხოლოდ სამკურნალოდ, არამედ დაინფიცირებისაგან თავის დასაცავადაც. ეს განსაკუთრებით მნიშვნელოვანია იმ ქვეყნებისთვის, სადაც აივ-ინფექცია ფართოდ არის გავრცელებული.
დოქტორი დებორა დონელი (Deborah Donnell) და მისი კოლეგები ფრედ ხატჩინსონის ონკოლოგიური ცენტრიდან აკვირდებოდნენ აფრიკის ქვეყნებში მცხოვრებ 3400 წყვილს, რომელთა შორის ერთი პარტნიორი დაავადებული იყო, მეორე – ჯანმრთელი.
ყველა დაავადებული ანტირეტროვირუსული საშუალებების მიღებას იწყებდა იმუნური სისტემის დაზიანების გამოვლენისთანავე.
1-3 წლის მანძილზე აივ-ინფექციით დაინფიცირდა 103 ჯანმრთელ მონაწილე. თითქმის ყველა შემთხვევაში (102) დაინფიცირებას ადგილი ჰქონდა დაავადებულთა მიერ ანტირეტროვირუსული პრეპარატების მიღების დაწყებამდე. მხოლოდ ერთ შემთხვევაში მოხდა დაინფიცირება ანტირეტროვურუსული თერაპიის დაწყების შემდეგ. ამრიგად, დაავადებული პარტნიორის მიერ ანტირეტროვირუსული საშუალებების მიღებამ 92% შემთხვევაში დაინფიცირებისაგან დაიცვა ჯანმრთელი პარტნიორი.
“ალბათობა იმისა, რომ ანტირეტროვირუსული საშუალებებით მკურნალობა ამცირებს პარტნიორის აივ-ინფექციით დაინფიცირების რისკს ძალიან მაღალია”, - აღნიშნავს დოქტორი დონელი. მისივე თქმით, კვლევის შედეგები უნიკალურია იმიტომ, რომ წყვილებზე დაკვირვება ხდებოდა ზედმიწევნით ყურადღებით და საკმაოდ ხშირად.
შიდსის ვირუსით გლობალურად დაინფიცირებულია 33 მილიონი ადამიანი, ხოლო 1980-იანი წლებიდან დაწყებული პანდემიის შემდეგ დღემდე დაღუპულია 25 მილიონი ადამიანი.
http://www.reuters.com
2010.02.22
