ამსტერდამის უნივერსიტეტის მკვლევარებმა პეტერ შეფერის (Peter Scheffer) ხელმძღვანელობით ადრეულ ეტაპზე ნაყოფის სქესის განსაზღვრის მეთოდიკა შეიმუშავეს.
2003-2009 წლებში ჩატარებულ კვლევებში მონაწილეობას ღებულობდა 201 ორსული ქალი. მეცნიერებმა ანალიზი გაუკეთეს 189 ქალს და ყველა შემთხვევაში შედეგები აღმოჩნდა ზუსტი და მზად იყო 2-4 დღეში.
ახალი მეთოდის ერთ-ერთ უპირატესობას წარმოადგენს ის ფაქტი, რომ სქესის განსაზღვრა ხდება დედისა და მამის სისხლის ნიმუშების მიხედვით ორსულობის უკვე მეხუთე კვირას. მეცნიერები ორსულის სისხლიდან გამოყოფდნენ დნმ-ს და შემდეგ იკვლევდნენ მას Y-ქრომოსომის გენების არსებობაზე. ეს გენებია SRY, რომელიც პასუხისმგებელია სათესლეების განვითარებაზე და DYS-14, რომელიც ასევე განსაზღვრავს ბავშვის მამრობით სქესს.
მდედრობითი სქესის ნაყოფის დასადგენად შეფერმა და მისმა კოლეგებმა შეიმუშავეს დედის სისხლის ნიმუშში დნმ-ს იმ ფრაგმენტების გამოვლენის ტექნოლოგია, რომელიც ინდივიდუალურად სპეციფიკურია მამისთვის, ე.წ. გენეტიკური პოლიმორფიზმის უბნები. თუ ასეთი ფრაგმენტი აღმოჩნდა (და ანალოგიური სპეციფიკური თანმიმდევრობა არ აღმოჩნდა დედის საკუთარ მემეკვიდრეობით ინფორმაციაში), მაგრამ, ამავე დროს, Y-ქრომოსომის ფრაგმენტები არ არის, მაშინ შეიძლება იმის მტკიცება, რომ ნაყოფი მდედრობითი სქესისაა.
შეფერის თქმით, ახალი მეთოდი საშუალებას მოგვცემს თავიდან ავირიდოთ გართულებები, რომელიც უკავშირდება ბავშვის სქესის განსაზღვრის ტრადიციული მეთოდების გამოყენებას (ამნიოცენტეზი და ქორიონის ხაოების ანალიზი) და ტრავმულია დედისთვის, რადგან მოითხოვს სანაყოფო ბუშტის პუნქციას.
შეფერმა ასევე აღნიშნა, რომ უფრო ადრეულ ეტაპზე ნაყოფის სქესის განსაზღვრა საშუალებას იძლევა, აუცილებლობის შემთხვევაში, ჩატარდეს დამატებითი კვლევები სასქესო ქრომოსომებთან დაკავშირებული მემკვიდრული პათოლოგიის გამოსავლენად.
http://Medportal.ru
2009.12.23
