ახალი კვლევის თანახმად, ქალსა და მამაკაცს შორის სქესობრივ ლტოლვის არსებობას შეიძლება საფუძვლად ედოს ბიოლოგიური მექანიზმი. როგორც ირკვევა, განსხვავებული გენების მქონე მამაკაცებისა და ქალების დაქორწინება უფრო სავარაუდოა, ვიდრე მსგავსი გენეტიკური მემკვიდრეობის მქონე ადამიანებისა. კვლევამ აჩვენა, რომ განსაზღვრული გენები აკონტროლებენ ქვეცნობიერ ლტოლვას ამა თუ იმ პარტნიორისადმი, რაც განაპირობებს ახლონათესაური შეწყვილების პრევენციასა და ბავშვების იმუნური სისტემის გაძლიერებას.
მკვლევარებმა შეისწავლეს 90 დაქორწინებული წყვილის გენები და აღმოაჩინეს, რომ მათი ქრომოსომების საკვანძო უბანში განთავსებული დნმ-ები მნიშვნელოვნად განსხვავდება იგივე უბანში განთავსებული იმ 152 წყვილის დნმ-ებისგან, რომლებიც შერჩეულნი იყვნენ შემთხვევითი არჩევის მეთოდით და არ ჰქონდათ ერთმანეთთან სქესობრივი კავშირი.
გენები, სახელწოდებით ჰისტოშეთავსებადობის მთავარი კომპლექსი (MHC), წარმოადგენს იმუნური სისტემის ნაწილს. ეს პირველი კვლევაა, რომელიც აჩვენებს ამ გენების მნიშვნელოვან როლს ადამიანთა დაწყვილების პროცესში.
MHC გენების მნიშვნელობის არარსებობის შემთხვევაში მკვლევარები მიიღებდნენ მსგავს განსხვავებებს წყვილების როგორც დაქორწინებულ, ისე არადაქორწინებულ ჯგუფებში. კვლევის დროს კი აღმოჩნდა სტატისტიკურად მნიშვნელოვანი განსხვავება ამ ორ ჯგუფს შორის, რაც ადასტურებს MHC გენების მნიშვნელობას სქესობრივი მიზიდულობის განვითარებაში.
“მიუხედავად იმისა, რომ თითქოს ადამიანები ირჩევენ მსგავს პარტნიორებს, ჩვენმა კვლევამ ნათლად აჩვენა, რომ სწორედ განსხვავებები განაპირობებენ წარმატებულ რეპროდუქციას და ქვეცნობიერი ლტოლვა ჯანმრთელი შთამომავლობისთვის მნიშვნელოვანია პარტნიორის შერჩევის დროს,”- ამბობს ბრაზილიელი მეცნიერი პროფესორი მარია და გრასა ბიკალიო (Maria da Graca Bicalho).
მისივე თქმით, მეცნიერები ვარაუდობენ კულტურული ასპექტის როლის დადგენას დაწყვილების პროცესში და არ არინ იმ თეორიის მკაცრად გამტარებლები, რომ გარკვეული გენეტიკური ვარიანტი მკაცრად განსაზღვრავს ქალის ან მამაკაცის ქმედებას, თუმცა პარტნიორის არჩევაში ქვეცნობიერი ევოლუციური ასპექტი არ უნდა იყოს უგულებელყოფილი.
მეცნიერები ვარაუდობენ, რომ MHC გენებს დაავადების საწინააღმდეგო მოქმედებასთან ერთად აღენიშნება ფაქიზი ეფექტი სხეულის არომატსა და ფერომონებზე, რაც შეიძლება მოქმედებდეს საწინააღმდეგო სქესის ქვეცნობიერ მიზიდულობაზე.
Steve Connor
http://www.independent.co.uk
2009.05.28
