მეცნიერები რამდენიმე წელია ვარაუდობდნენ პერიოდონტიტსა და გულის ინფარქტს შორის კავშირის შესახებ. ამჯერად მკვლევარებმა პირველად აღმოაჩინეს ამ ორ მდგომარეობას შორის გენეტიკური კავშირი, რის შესახებაც განაცხადეს ადამიანის გენეტიკის ევროპული საზოგადოების კონფერენციაზე.
გერმანელი დოქტორის არნე შეფერის (Arne Schaefer) თქმით, მისმა გუნდმა აღმოაჩინა ამ ორი დაავადების განვითარებასთან დაკავშირებული გენი, რომელიც განთავსებულია მე-9 ქრომოსომში. 9p21.3 ქრომოსომული ლოკუსი უფრო ადრე იყო იდენტიფიცირებული, როგორც მიოკარდიუმის ინფარქტთან ასოცირებული უბანი. ამჟამად ამ უბნის შესწავლა მოხდა აგრესიული ადრეულად გამოვლენილი პერიოდონტიტის მქონე 151 პაციენტსა და გულის იშემიური დაავადების (გიდ) მქონე 1097 პაციენტში, რომელთაც გადატანილი ჰქონდათ მიოკარდიუმის ინფარქტი. გენეტიკური ვარიანტი ორივე კლინიკურ შემთხვევაში იყო იდენტური. იგივე დადასტურდა გიდ-ის მქონე 1100 პაციენტსა და პერიოდონტიტის მქონე 180 პაციენტზე შემდგომში ჩატარებული კვლევითაც. დოქტორი შეფერი აღნიშნავს, რომ ზ.ა. გენეტიკური რისკ-ვარიანტი იწვევს ANRIL დნმ-ის კოდირებას, რომელიც იდენტურია ორივე დაავადებისთვის.
გიდ მსოფლიოში სიკვდილიანობის წამყვანი მიზეზია. პერიოდონტიტი იწვევს კბილების საყრდენი შემაერთებელი და ძვლოვანი ქსოვილების დაზიანებას, რაც 40 წლის ასაკის ზემოთ კბილების დაკარგვის მთავარ მიზეზს წარმოადგენს. პერიოდონტიტი აღენიშნება 60 წელზე უფროსი ასაკის ადამიანების დაახლოებით 90%-ს. ორივე დაავადება დაკავშირებულია, ასევე, საერთო რისკ-ფაქტორებთან, როგორიცაა, მოწევა, დიაბეტი, სიმსუქნე და მამრობითი სქესი. დადგენილია, ასევე, პირის ღრუსა და ათეროსკლეროზული ფოლაქის ბაქტერიული ფლორის იდენტურობა, მსგავსი არაბალანსირებული იმუნური სისტემისა და ქრონიკული ანთებითი პროცესის არსებობა ორივე დაავადების შემთხვევაში.
“ახლა დარწმუნებული ვართ ამ ორ დაავადებას შორის მყარი გენეტიკური კავშირის არსებობაში. პერიოდონტიტის მქონე პაციენტი უნდა ეცადოს შეამციროს რისკ-ფაქტორების მოქმედება და განახორციელოს პრევენციული ზომები დაავადების ადრეულ სტადიაზე”, - ამბობს დოქტორი შეფერი. მისივე თქმით, მომავალში სპეციფიკური პათოფიზიოლოგიური პროცესების უკეთ გარკვევით, უთუოდ შესაძლებელი გახდება ეფექტური ჩარევის განხორციელება დაავადების გამოვლენამდე.
http://www.sciencedaily.com
2009.05.27
