რუსეთის იმუნოლოგიის სახელმწიფო ინსტიტუტის დირექტორთა საბჭომ ამ დღეებში ოფიციალური განცხადება გააკეთა. მან აღიარა, რომ იწყებს უნიკალური ანტიშიდსური ვაქცინის გამოცდას, რომელზეც ინსტიტუტის ეპიდემიოლოგები წლების განმავლობაში მუშაობდნენ. ფორმულა გამოყვანილია და ვაქცინამ ადამიანებზე კლინიკური გამოცდის ნებართვა რუსეთის ჯანდაცვის სამინისტროსაგან 2004წლის ბოლოს მიიღო.
რუსეთის ფედერაციის კანონმდებლობის გათვალისწინებით, არ ხმაურდება კვლევაში მონაწილე პირთა ვინაობა და მკაცრად დაცულია კონფიდენციალურობა. სავარაუდოდ, ვაქცინის გამოცდის პროექტში 29 ათასი ვირუსის მატარებელი მიიღებს მონაწილეობას, მათ შორის 2 ათასი ბავშვი იქნება. ეს ციფრი რუსეთისათვის არც ისე დიდია, თუ გავითვალისწინებთ, რომ ამ ქვეყნის მოსახლეობის 2 პროცენტი შიდსით არის ინფიცირებული.
ამ ეტაპზე ფმბა-ს ექსპერტები მიიჩნევენ, რომ ერთადერთი რეალური გამოსავალი შიდსის შესაჩერებლად ვაქცინაციაა. მსოფლიოს წამყვან იმუნოლოგიურ ცენტრებში ხსენებული ვაქცინის შესაქმნელად ყოველწლიურად მილიონობით დოლარი იხარჯება, მაგრამ როგორც მოსკოველები იუწყებიან, მათ დიდი თანხები არ დახარჯვიათ. წინაკლინიკური შემოწმება პრეპარატმა უკვე გაიარა, მაგრამ მისი ეფექტურობის დასადასტურებლად აუცილებელია ადამიანთა, ამ შემთხვევაში შიდსით დაავადებულთა საკმაო რაოდენობა, რომელიც კვლევაში ნებაყოფლობით მიიღებს მონაწილეობას.
მოსკოვის ეპიდზედამხედველობის ფედერალური სამსახურის მონაცემებით შიდსის ახალი ანტივირუსული ვაქცინის მახასიათებლები ასეთია:
1.წინაკლინიკურმა გამოკვლევებმა უჩვენა, რომ ვაქცინა აბსოლუტურად უვნებელია, ვინაიდან შეიცავს შიდსის ვირუსის სინთეტიკურ ანტიგენურ ცილას, რომელიც მიღებულია გენური ინჟინერიის გზით. ამავე დროს, არ შეიცავს ვირუსულ ნაწილაკებს;
2.აღნიშნული ცილა ქიმიურ კავშირში იმყოფება პოლიოქსიდონის იმუნოსტიმულატორთან, რომელიც უკვე 10 წელია გამოიყენება, როგორც მაღალეფექტური პრეპარატი სხვადასხვა იმუნოდეფიციტების დროს. იგი ამავე დროს, ანტიოქსიდანტიცაა;
3.სწორედ ეს პოლიოქსიდანტი აძლევს მეცნიერებს საფუძველს, ვაქცინა გამოიყენონ არამარტო აივ-ინფექციების პროფილაქტიკის, ასევე ვირუსის სამკურნალოდაც.
4.გარდა ამისა, მას ანტიმიკრობული ზემოქმედების აღმოჩენაც შეუძლია არამარტო შიდსის, არამედ სხვა ვირუსებსა და ბაქტერიებზეც.
“კვირის ქრონიკა” 21-27.02.2005:13
2005.02.23
