დედისაგან გადაცემული შიდსის შემთხვევაში ახალშობილებს შეიძლება აღენიშნოთ ნორმალური იმუნური პასუხი საბავშვო ვაქცინებზე, თუ მაღალი აქტივობის მქონე ანტირეტროვირალური მკურნალობა (HAART) ჩატარება ერთი წლის ასაკამდე, იტყობინებიან მეცნიერები.
მაღალი აქტივობის მქონე ანტირეტროვირალური მკურნალობა მოიცავს აივ-ინფექციის საწინააღმდეგო მოქმედების სხვადასხვა კლასის სამ ან მეტ მედიკამენტს.
რომის უნივერსიტეტის დოქტორის პაოლო როსისა (Paolo Rossi) და მისი კოლეგების თქმით, ვაქცინაზე ნორმალური იმუნური საპასუხო რეაქციის გამომუშავებისთვის მთავარ ფაქტორს წარმოადგენს აივ-ინფექციის მქონე ბავშვისთვის HAART-ის დაწყების დრო.
აივ-ინფექციის დროს სპეციფიკური დაავადებების ვაქცინებზე საპასუხოდ აღინიშნება ანტისხეულების წარმომშობი უჯრედების რაოდენობის დაქვეითება. შედეგად, მცირდება ბავშვის იმუნიტეტი დაავადებაზე. HAART-ის დაწყების დროის მნიშვნელობის დასადგენად ჩატარდა კვლევა აივ-ინფექციის მქონე 70 ბავშვსა და 50 ჯანსაღ საკონტროლო სუბიექტზე.
30 დაინფიცირებულ ბავშვს HAART ჩაუტარდა დაბადებიდან ერთ წლამდე, 6 -ს – არ ჩაუტარდა მკურნალობა, ხოლო დანარჩენებს აღნიშნული მკურნალობა მოგვიანებით ჩაუტარდათ. ყველა ბავშვს გაუკეთდა წითელასა და ტეტანუსის საწინააღმდეგო აცრა,
ერთ წლამდე HAART-ის ჩატარების შემთხვევაში აღინიშნებოდა ანტისხეულების წარმომქმნელი უჯრედების ნორმალური რაოდენობის შენარჩუნება, ხოლო სხვა ჯგუფებში კი ამ უჯრედების რაოდენობის შემცირება.
კვლევის ავტორთა თქმით, აივ-ინფექციის მქონე ბავშვებისთვის ადრეული ანტირეტროვირალური მკურნალობა უზრუნველყოფს ნორმალურ იმუნური პასუხის შენარჩუნებას, ხოლო დაბადებიდან ერთი წლის შემდეგ HAART-ის დაწყების შემთხვევაში ვაქცინაციის ჩვეულებრივი განრიგი გადახედილი უნდა იქნეს.
http://www.reuters.com
2009.04.30
