ცხელი ჩაის სმა უკავშირდება ეზოფაგალური კიბოს განვითარების მომატებულ რისკს, აღნიშნავენ ირანელი მეცნიერები.
ჟურნალში British Medical Journal გამოქვეყნებული კვლევის მიხედვით 70° C-ის ან მასზე მეტი ტემპერატურის შავი ჩაის სმა იწვევს აღნიშნული რისკის მატებას.
ექსპერტთა თქმით, ამ მონაცემებით შეიძლება აიხსნას საყლაპავის კიბოს მაღალი რისკის არსებობა აღმოსავლეთის ზოგ პოპულაციაში.
რძის დამატებით, რასაც დასავლეთი ქვეყნების უმრავლესობაში აქვს ადგილი, სასმელი ცივდება, რაც ამცირებს რისკს.
საყლაპავის კიბო კლავს 500 000-ზე მეტ ადამიანს ყოველწლიურად მსოფლიოში, ხოლო ეზოფაგალური ბრტყელუჯრედოვანი კარცინომა (OSCC) არის კიბოს ყველაზე გავრცელებული ფორმა.
თამბაქო და ალკოჰოლი ის ძირითადი ფაქტორებია, რომელსაც უკავშირდება ეზოფაგალური კიბოს განვითარება ევროპასა და ამერიკაში.
ჩრდილოეთ ირანში მდებარე გოლესტანის პროვინციაში აღიშნება OSCC-ის ერთ-ერთი ყველაზე მაღალი მაჩვენებელი, მოწევისა და ალკოჰოლის მოხმარების დაბალი დონე და მამაკაცების მსგავსად, ქალებშიც ამ დაავადების ანალოგიური გავრცელება.
ირანელმა მეცნიერებმა შეისწავლეს ამ პროვინციის OSCC დიაგნოზის მქონე ავადმყოფებში ჩაის დალევის ჩვევა და შეადარეს ის ჯანმრთელი ადამიანების იგივე მაჩვენებელს.
როგორც გაირკვა, გრილ ან თბილ ჩაისთან (65° C ან ნაკლები) შედარებით ცხელი ჩაის (65-69° C ) მოხმარება ასოცირდებოდა ეზოფაგალური კიბოს განვითარების რისკის ორჯერ მატებასთან, ხოლო ძალიან ცხელი ჩაის (70° C და მეტი) მოხმარება - რისკის რვაჯერ მატებასთან.
მეცნიერების თქმით, ასევე მნიშვნელოვანია ცხელი სასმელის დალევის სისწრაფე. ასოციაციური კავშირები არ იქნა ნანახი მიღებული სასმელის რაოდენობასა და კიბოს განვითარების რისკს შორის.
მკვლევარებმა დამატებით ჩაატარეს ცდა 50 000 მოხალისეზე და შედეგები მიიღეს ანალოგიური.
კვლევის ავტორები ჩაის მომხმარებლებს ურჩევენ თავი შეიკავონ “ქაფქაფა” ჩაის დალევისგან და რამდენიმე წუთი მოითმინონ, სანამ სასმელი ცოტა არ გაგრილდება.
http://news.bbc.co.uk
2009.03.30
