პირის ღრუ - მრავალი დაავადების სარკეა. რატომ არის კბილები ასეთი სხვადასხვა ფერის? მართალია, თუ არა, რომ თეთრი კბილები ჯანმრთელობის მაჩვენებელია, ხოლო ყვითელი კი - რაიმე დაავადებაზე მიუთითებს?
ეს ასე სრულებითაც არ არის. სტომატოლოგთან მიღებაზე ძირითადად სამი ფერის კბილები ფიქსირდება: მოლურჯო-თეთრი, მოყვითალო-თეთრი და ყვითელი. გარდამავალი ტონალობები კი მრავალია, რის გამოც შესაფერისი ფერთა გამის შერჩევა პროტეზისტებს საკმაო შრომად უჯდებათ.
კბილების ფერს შეუძლია სხვადასხვა დაავადებაზე მიგვითითოს. მუქი ყვითელი (ზოგჯერ საღეჭ ზედაპირზე არსებული მოწითალო ლაქებით) ფერი არცთუ იშვიათად თირკმელზედა ჯირკვლის ჰიპერფუნქციაზე მიუთითებს. ეს, რასაკვირველია, მხოლოდ ვარაუდია და არა დადასტურებული ფაქტი, მაგრამ პაციენტის გაფრთხილება მაინც საჭიროა. თუ კბილებზე დაბურული ზოლები ჩანს, ეს ბავშვობის ასაკში კბილების ფორმირების პროცესში მინერალურ ნივთიერებათა ცვლის დარღვევაზე მიუთითებს. რძისფერი-თეთრი კბილები ხშირად გვხვდება ფარისებრი ჯირკვლის ჰიპერფუნქციის დროს.
ანტიბიოტიკების, კერძოდ ტეტრაციკლინის ჯგუფის, ხანგრძლივი მიღებისას კბილები ძალიან სწრაფად და ადვილად მუქდება. გვხვდება მუქი მომწვანო ფერის ნადები. მას იწვევს ზოგიერთი სახის სოკო-საპროფიტები, რომლებიც, ჩვეულებრივ ბინადრობენ პირის ღრუში და ხელს არაფერს არ უშლიან. ზოგჯერ, გაურკვეველი მიზეზების გამო, იწყება მათი სწრაფი ზრდა-გამრავლება, რაც იწვევს დისკოლორიტს, ანუ კბილების ფერის შეცვლას.
თუკი რაიმე მიზეზის გამო ადამიანი რეგულარულად არ იწმინდავს კბილებს, ისინი იღებენ მოყავისფრო ფერს. კვების რაციონში ცოცხალი ფოთლოვანი ბოსტნეულის ნაკლებობის გამო, ასევე ნაღვლის ბუშტის, პანკრეასის და ელენთის დაავადებების დროს კბილები ხდება რუხი ფერის. თუკი ადამიანი ყოველდღიურად ჭარბი რაოდენობით იღებს წვენებსა და ხილს, კბილები შეიძლება მოწითალო ფერისაც კი გამოჩნდეს.
რაც შეეხება მკვეთრი თეთრი ფერის კბილებს, ისინი საკმაოდ იშვიათია. მათი არსებობა როდი მიუთითებს ადამიანის კარგ ჯანმრთელობაზე. პირიქით, მოყვითალო-კრემისფერი კბილების არსებობა ქალებში მეტყველებს იმაზე, რომ ისინი საკმარისი რაოდენობით ფტორს იღებენ. ფტორი კი ამაგრებს კბილის ემალს. ასეთი კბილები ბევრად უფრო გამძლეა, ვიდრე იმ ადამიანების კბილები, რომლებიც გამოირჩევიან ”ჰოლივუდური ღიმილით”. ცნობილია, რომ ზოგიერთი ქალები მარგალიტისფერი კბილების მისაღებად პასტებში ამატებენ წყალბადის ზეჟანგს, თუმცა ასეთი შემცველობის მქონე (ოღონდ ზომიერი კონცენტრაციით) კბილის საწმენდი საშუალებები ისედაც არის გაყიდვაში. სწრაფი ეფექტის მიღწევის სურვილი შეიძლება გახდეს პირის ღრუს ლორწოვანის გაღიზიანების, ღრძილებზე წყლულების გაჩენისა და კბილის ემალის დაზიანების მიზეზი.
კბილების კარგი გათეთრება იაფი როდი ღირს. დისკოლორიტის ხარისხიანი ლიკვიდაციისათვის არ არის საკმარისი ერთი და ორი ვიზიტი სტომატოლოგთან. ეს პროცესი გრძელდება სულ მცირე ათი-თოთხმეტი დღე. სამწუხაროდ, ადამიანები გვიან იწყებენ ამაზე ზრუნვას. შეამჩნევთ თუ არა ნადებს, კბილის ფერის შეცვლას, ასევე ქვებს, შავ წერტილებს კბილებზე, აუცილებლად უნდა მიმართოთ ექიმს. აღარ არის ლაპარაკი უფრო რთულ შემთხვევებზე, ვინაიდან აქ არ არის საქმე მხოლოდ კბილების უცნაურ ფერში, არამედ ამის უკან შეიძლება სერიოზული დაავადება იმალებოდეს.
http://www.medportal.ru
2006.09.22
