ადამიანის ორგანიზმს გააჩნია იმუნოდეფიციტის ვირუსისგან ბუნებრივი დაცვის მექანიზმი, მაგრამ მეცნიერებმა დღემდე არ იცოდნენ, როგორ აემოქმედებინათ მისი დაბლოკილი პოტენციალი. ამერიკელმა ბიოლოგებმა პირველად გაშიფრეს ამ დამცავი მექანიზმის საკვანძო ელემენტის სტრუქტურა. ეს კი რიგი დაავადებების, კერძოდ კი, აივ-ინფექციის საწინააღმდეგო ახალი სამკურნალწამლო პრეპარატების შექმნის შესაძლებლობას იძლევა, ნათქვამია ჟურნალ Nature-ის მიერ გამოქვეყნებულ სტატიაში.
APOBEC-3G ფერმენტი ადამიანის ორგანიზმის თითოეულ უჯრედშია. მას აქვს უნარი, ადამიანის იმუნოდეფიციტის ვირუსის (აივ) გამრავლება შეაჩეროს პირველ სტადიაზე, როცა ვირუსი საკუთარ დნმ-ს წარმოქმნის. მაგრამ ადამიანები შიდსით მაინც ავადდებიან, რადგან ადამიანის იმუნოდეფიციტის ვირუსი გამოიმუშავებს Vif ცილას, რომელიც ფერმენტის ბლოკირებას ახდენს.
კვლევის ავტორებმა სამხრეთ კალიფორნიის უნივერსიტეტიდან, რომლებსაც ჩენ ხიაოცზიანი (Xiaojiang Chen) ხელმძღვანელობდა, პირველებმა შეძლეს ამ ფერმენტის აქტიური ნაწილის ატომური სტრუქტურის დადგენა. ამით მეცნიერებმა შეძლეს გაეგოთ, თუ როგორ უერთდება ფერმენტი ვირუსის დნმ-ს და შლის მას.
”ჩვენ გავიგეთ, თუ როგორ ურთიერთმოქმედებს ეს ფერმენტი დნმ-თან. ამის ცოდნა კი გვაძლევს საფუძველს, შევქმნათ აივ-ის საწინააღმდეგო წამალი”,- ამბობს ჩენ ხიაოცზიანი.
მეცნიერის თქმით, მისი ჯგუფის კვლევებმა ვირუსული ცილის ფერმენტთან ურთიერთქმედების შესახებ მნიშვნელოვანი მონაცემები მოგვცეს. ეს კი გვაძლევს იმის საშუალებას, რომ ანტივირუსული ფერმენტის ბლოკირება თავიდან ავიცილოთ და მას თავისი სამუშაოს შესრულების შესაძლებლობა მივცეთ.
APOBEC-3G ფერმენტს შეუძლია წინააღმდეგობა გაუწიოს B ჰეპატიტის ვირუსსაც.
http://newsgeorgia.ge
2008.10.13
