ძლიერი ანტიოქსიდანტური თვისებების წყალობით, წითელ ღვინოს შეუძლია შეამციროს ფილტვის კიბოს განვითარების ალბათობა მწეველებში. 3 წლიანი კვლევის თანახმად, რომელიც მოიცავდა 45-69 წლამდე ასაკის, 84 000-ზე მეტ, მწეველ ადამიანს, ამ ალკოჰოლური სასმელის ზომიერი რაოდენობით მიღება იცავს ფილტვებს დაზიანებისგან და სიმსივნური უჯრედების აქტივაციისგან.
მედიკოსებმა შეადარეს ლუდის, წითელი და თეთრი ღვინის, აგრეთვე ძლიერი სპირტიანი სასმელების გავლენა ფილტვის სიმსივნის განვითარებაზე. ასაკის, განათლების დონის, სხეულის მასის ინდექსის, სასუნთქი გზების ქრონიკული დაავადებების, ემფიზემისა და სხვა ფაქტორების მხედველობაში მიღების შემდეგ, აგრეთვე ალკოჰოლის მიღებისა და მოწევის სიხშირის გათვალისწინებით, აშშ მკვლევარებმა კალიფორნიის სამეცნიერო-კვლევითი ცენტრიდან დაასკვნეს, რომ მხოლოდ წითელი ღვინო ახდენს სიმსივნური წარმონაქმნების პრევენცირებას მოწევის შედეგად დასუსტებულ ფილტვებში.
მკვლევარებმა დაადგინეს, რომ დღეში 1 ბოკალი ღვინის მიღებით 2-ჯერ მცირდება ფილტვის კიბოს დიაგნოსტირების რისკი, ხოლო ამ რისკის უფრო მნიშვნელოვანი კლება აღინიშნა იმ მწეველებში, რომლებიც დღეში 2 ბოკალ ღვინოს მიირთმევდნენ. ამ შემთხვევაში დაფიქსირდა ფილტვის კიბოს რისკის 60%-იანი კლება.
წითელი ღვინო მდიდარია რესვერატროლის ტიპის ანტიოქსიდანტებით, რომლებსაც შეიცავს ყურძენი.
მიუხედავად ამისა, მედიკოსები აცხადებენ, რომ ჯანმრთელობის შენარჩუნების საუკეთესო საშუალებას წარმოადგენს მოწევის შეწყვეტა, ვინაიდან დღე-ღამეში 2 ბოკალი ღვინის მიღებაც კი არ უზრუნველყოფს ფილტვის კიბოსგან 100%-იან დაცვას. ამასთან, კლინიცისტები დასძენენ, რომ კვლევის შედეგები არავითარ შემთხვევაში არ უნდა იქნას ინტერპრეტირებული, როგორც რეკომენდაცია ალკოჰოლის ხშირ და უკონტროლო მიღებაზე.
http://www.medlinks.ru
2008.10.10
