ჰოლანდიელი მეცნიერები იწყებენ ფართომასშტაბიან კვლევას, რომელიც ეხება ასთმისა და ჭინჭრის ციების საწინააღმდეგო, ახალ მედიკამენტს.
წამალი, სახელად RPL554, მოქმედებს ისე, რომ ჰაერსასუნთქი გზები მუდმივად გახსნილ მდგომარეობაშია, იგი აქრობს ანთებით პროცესებს და იცავს ადამიანს იმ გამღიზიანებლების მავნე მოქმედებისგან, რომლებიც იწვევენ ასთმის განვითარებას.
კვლევა ტარდება წამლის მწარმოებლის, ვერონა ფარმას მიერ ნიდერლანდებში, წამლის სამეცნიერო კვლევის ცენტრში.
მარტო დიდი ბრიტანეთის მაგალითზე, ასთმით დაავადებულ, 5.2მლნ ადამიანს ასევე აღენიშნება ჭინჭრის ციება.
როდესაც ეს ორი პათოლოგიური მდგომარეობა ერთად არის წარმოდგენილი, ადამიანს უმძაფრდება ასთმის შეტევები და ის საჭიროებს ხშირ ჰოსპიტალიზაციას.
ასთმისა და ჭინჭრის ციების სამკურნალო, ამჟამად არსებულ მედიკამენტებს მიეკუთვნება ბეტა-აგონისტები. ისინი ეფექტურია ამ დაავადებების კონტროლირებაში, თუმცა არსებობს გვერდითი ეფექტების მაღალი რისკი, მათ შორის კარდიოვასკულარული სისტემის დაზიანების ალბათობა.
მეცნიერები ვარაუდობენ, რომ RPL554 არის ისეთივე ეფექტური, როგორც ბეტა-აგონისტები, ამასთან მას აქვს გაცილებით მცირე გვერდითი ეფექტები.
ახალი წამალი თრგუნავს იმ ორი ენზიმის მოქმედებას, რომლებიც ასრულებენ მთავარ როლს ასთმისა და ჭინჭრის ციების სიმპტომების განვითარებასა და პროგრესირებაში.
ერთ-ერთი ენზიმის, ფოსფოდიესტერაზა 3-ის ბლოკირებით, ხდება ჰაერსასუნთქი გზების გახსნა, ხოლო მეორე ენზიმის, სახელად ფოსფოდიესტერაზა 4-ის მოქმედების დათრგუნვა კი, წარმოადგენს დამხმარე საშუალებას ანთებითი რეაქციების კონტროლირებაში.
ვინაიდან წამალი ხანგრძლივმოქმედია, მწარმოებლები ვარაუდობენ, რომ პაციენტებს მისი დღეში მხოლოდ ერთხელ მიღება დაჭირდებათ.
http://news.bbc.co.uk
2008.09.10
