გასული კვირის ბოლოს დასრულდა მასშტაბური კვლევა, რომელიც ეხებოდა თანამედროვე მედიკამენტების გავლენას აივ-ინფიცირებული ადამიანების სიცოცხლის ხანგრძლივობაზე. კვლევის შედეგები გამოქვეყნებულია ჟურნალში “Lancet”.
1990 წლის მონაცემებთან შედარებით, ანტირეტროვირუსულ თერაპიაზე მყოფი, აივ-ინფიცირებული ადამიანების სიცოცხლის საშუალო ხანგრძლივობა 13 წლამდე გაიზარდა. ექსპერტების აზრით, აივ-საწინააღმდეგო მედიკამენტების დახმარებით, სასიკვდილო ინფექცია თანდათანობით გარდაიქმნება ქრონიკულ ინფექციად, ისეთად, როგორიცაა მაგ. დიაბეტი.
კანადელი მეცნიერების მიერ ჩატარებულ კვლევაში მონაწილეობა მიიღო 43 000-მა პაციენტმა. ისინი ღებულობდნენ ანტირეტროვირუსულ პრეპარატებს, რომლებიც ხელს უშლიდნენ იმუნოდეფიციტის ვირუსის გამრავლებას ადამიანის ორგანიზმში.
მეცნიერები პაციენტთა სიცოცხლის ხანგრძლივობას აფასებდნენ დაკვირვების 3 პერიოდის მანძილზე: 1996-1999, 2000-2002 და 2003-2005 წლებში. კვლევის ყველა მონაწილე იყო განვითარებული ქვეყნების მოქალაქე და არც ერთ მათგანს არ გააჩნდა მკურნალობაზე ხელმისაწვდომობის რაიმე პრობლემა.
მიღებული შედეგები მოწმობს იმაზე, რომ ბაზარზე ახალი მედიკამენტების გამოჩენამ მნიშვნელოვნად გაზარდა შიდსით დაავადებულთა სიცოცხლის ხანგრძლივობა. თუ 1996-1999 წლებში 20 წლის ასაკის პაციენტის სიცოცხლის საშუალო ხანგრძლივობა შეადგენდა 36,1 წელს, 2003-2005 წლებში ეს მაჩვენებელი 49,4 წლამდე გაიზარდა. ანალოგიური დინამიკა დაფიქსირდა სხვა ასკობრივ ჯგუფებშიც. დაკვირვების მთელი პერიოდის მანძილზე სიკვდილობის მაჩვენებელი მცირდებოდა, ხოლო პაციენტთა საშუალო ასაკი კი, პირიქით - მატულობდა.
ანტირეტროვირუსული თერაპიის განვითარებამ შიდსი აქცია ხანგრძლივ, ქრონიკულ დაავადებად. თუმცა მეცნიერები აცხადებენ, რომ აივ-ინფექცია ძველებურად ამცირებს განვითარებად ქვეყნებში მცხოვრებთა სიცოცხლის ხანგრძლივობას, შედარებით იმ პაციენტებთან, რომლებიც განვითარებული ქვეყნების მოქალაქეები არიან.
http://www.medlinks.ru
2008.07.29
