გრეიფრუტი შესაძლოა C-ჰეპატიტის სამკურნალო, ახალ საშუალებად იქცეს. წინასწარმა ლაბორატორიულმა კვლევებმა აჩვენა, რომ გრეიფრუტისა და სხვა ციტრუსების შემადგენლობაში მყოფ ნაერთ – ნარინგენინს შესწევს უნარი, 80%-ით შეამციროს C-ჰეპატიტის ვირუსის გავრცელება. ეს კი ჯანმრთელ უჯრედებს აღდგენისა და C-ჰეპატიტის ვირუსის წინააღმდეგ ბრძოლის საშუალებას მისცემს, აცხადებენ ჰარვარდის სამედიცინო სკოლის მეცნიერები. მათი აზრით, საჭიროა სასწრაფოდ შემუშავდეს C-ჰეპატიტის წინააღმდეგ ბრძოლის ახალი მეთოდები, ვინაიდან მკურნალობის არსებული მეთოდები ყოველთვის არ იძლევა სასურველ შედეგებს და რაც მთავარია, ისინი მრავალი გვერდითი ეფექტით ხასიათდებიან.
მეცნიერებმა in vitro კვლევის საფუძველზე დაადგინეს, რომ ნარინგენინი მიმართულია დაბალი სიმკვრივის ლიპოპროტეინების, ე.წ. “ცუდი” ქოლესტერინის წინააღმდეგ. ცნობილი გახდა ისიც, რომ C-ჰეპატიტის ვირუსი სწორედ ამ ქოლესტერინის მეშვეობით გადაადგილდება ორგანიზმში. დამტკიცდა, რომ ნარინგენინი “აკავებს” დაბალი სიმკვრივის ლიპოპროტეინებს და ამ გზით აფერხებს ვირუსის გავრცელებას.
მაგრამ ადამიანი ვერ შეძლებს გრეიფრუტის იმ რაოდენობით მიღებას, რომ ზ. ა. მექანიზმი განხორციელდეს და მიღწეულ იქნას თერაპიული ეფექტი. ამიტომ აუცილებელია ისეთი პრეპარატის შექმნა, რომლის შემადგენლობაშიც იქნება ნარინგენინი.
ვინაიდან ეს შენაერთი არც თუ კარგად აბსორბირდება ნაწლავებში, ნარინგენინის პრეპარატი ორგანიზმში უნდა შეყვანილ იქნას ვენიდან. ცხოველებზე ჩატარებული კვლევის შედეგად დადგინდა, რომ ნარინგენინი არ იწვევს ღვიძლის ფერმენტების დონის მატებას. მეცნიერები აცხადებენ, რომ საჭიროა დამატებითი კლინიკური კვლევების ჩატარება, რათა საბოლოოდ დამტკიცდეს ნარინგენინის როლი C-ჰეპატიტის ვირუსის წინააღმდეგ.
კვლევა გამოქვეყნდა ჟურნალის “Hepatology” მაისის ნომერში.
http://www.medlinks.ru
2008.05.14
