ლონდონის სამეფო კოლეჯის ფსიქიატრიის ინსტიტუტის მკვლევარებმა აღმოაჩინეს ნივთიერება, რომელიც შესაძლოა გამოყენებულ იქნას კოგნიტიური დარღვევების მკურნალობაში, დაუნის სინდრომით დაავადებულ ადამიანებში.
კვლევამ, რომელიც გამოქვეყნდა ჟურნალის “ზოგადი ფსიქიატრიის არქივები”, დაადგინა, რომ ავადმყოფთა ტვინის ქსოვილებში მომატებულია მიოინოზიტოლის დონე, რომელიც კორელირებს ინტელექტუალური შესაძლებლობების შემცირებასთან. მეცნიერები ასევე ვარაუდობენ, რომ მაღალი კონცენტრაციით, ეს ნივთიერება იწვევს ალცჰეიმერის დაავადების ადრეულ განვითარებას დაუნის სინდრომით დაავადებულ პაციენტებში, ვინაიდან, მიოინოზიტოლი ასტიმულირებს ამილოიდური ბალთების ფორმირებას, რაც, თავის მხრივ, ალცჰეიმერის დაავადების ნიშანია.
დაუნის სინდრომით დაავადებულ, პრაქტიკულად ყველა ადამიანს 40 წლამდე უვითარდება ისეთი ცვლილებები ტვინში, რაც ახასიათებს ალცჰეიმერის დაავადებას, თუმცა ყველა მათგანი არ ავადდება ამ დაავადებით. დაუნის სინდრომით გამოწვეული გონებრივი ჩამორჩენილობისა და პროგრესირებადი ჭკუასუსტობის კომბინაციის მკურნალობა ძალზე რთული პროცესია.
როგორც კვლევის ხელმძღვანელმა, პროფ. დ. მერფიმ განაცხადა, ახალი კვლევის შედეგად დადგინდა, რომ დაუნის სინდრომით დაავადებულ, მოზრდილ პაციენტებში აღინიშნება მიოინოზიტოლის მომატებული დონე ჰიპოკამპის მიდამოში, რაც კორელირებს კოგნიტიური დარღვევების დონესთან. ამჟამად მეცნიერები ცდილობენ დაწიონ ამ ნივთიერების დონე ტვინში და იმედოვნებენ, რომ ეს იქნება დაუნის სინდრომის მკურნალობის ახალი მეთოდი.
დაუნის სინდრომი – ეს არის გონებრივი განვითარების შეფერხების ყველაზე გავრცელებული გენეტიკური მიზეზი. დაავადება გამოწვეულია 21-ე ქრომოსომის სამი ასლის არსებობით, ნაცვლად ორისა. 21-ე ქრომოსომის ერთ-ერთი გენი აკოდირებს ტრანსპორტერს, რომელიც უზრუნველყოფს მიოინოზიტოლის ტრანსპორტს ტვინში. ამ უკანასკნელის მომატებული დონე კი შესაძლოა გამოწვეული იყოს ამ გენის დამატებითი ასლის არსებობით ასეთ პაციენტებში.
http://www.medlinks.ru
2008.04.24
