აღმოჩნდა, რომ ხორცი, ნაყინი და მწვადი შეიძლება იმაზე უკეთესი იყოს, ვიდრე აქამდე გვეგონა.
ხორცი
ქალები ხშირად ამბობენ უარს ”წითელ” ხორცზე წონაში დაკლების მიზეზით. სინამდვილეში, უცხიმო ”წითელ” ხორცში ნაკლები კალორიაა, ვიდრე კარგად ნაკვებ ქათამში. 100 გრამი სიმინდით ნაკვები ქათმის ხორცი შეიცავს 129 კალორიასა და 4,8 გრ ცხიმს, ხოლო ნაკლებად ცხიმიანი ძროხის წითელი ხორცის იგივე წონის ნაჭერი შეიცავს 135 კალორიასა და 4,5 გრამ ცხიმს. უფრო მეტიც, ძროხის რბილი ხორცი შეიცავს სამჯერ მეტ რკინას, რომელიც ასე აკლია ქალების უმეტესობას და თითქმის 4-ჯერ მეტ ცინკს, რომელიც აუცილებელია იმუნიტეტისათვის. რაც შეეხება ნაჯერ ცხიმოვან მჟავეებს, რომლებიც სისხლძარღვთა ათეროსკლეროზული ცვლილებების გამომწვევია, სიმინდით გამოზრდილი ქათამი მას არანაკლები რაოდენობით შეიცავს. ასე, რომ წითელი უცხიმო ხორცის მიღება კვირაში რამოდენიმეჯერ შეიძლება თქვენი დიეტისათვის სასარგებლო დამატება აღმოჩნდეს.
ნაყინი
რასაკვირველია, არ შეიძლება ნაყინის მირთმევა ყოველ საღამოს ტელევიზორის წინ და თანაც საკმაო რაოდენობით. მაგრამ ასევე არ არის საჭირო მისი საერთოდ ამოღება რაციონიდან. ნაყინის გადამუშავება ნელ-ნელა ხდება კუჭში, სისხლი თანდათანობით გაჯერდება შაქრით, ამიტომაც სხვა ტკბილეულისაგან განსხვავებით, შეიძლება მისი მირთმევა ნაკლები რაოდენობით, მაგ. 75 გრამი ნაყინის ბურთულა შეიცავს მხოლოდ 114 კალორიას და 6გრ ცხიმს. ამიტომაც ის უკეთესი დესერტია სადილის შემდეგ ხაჭაპურის ნაჭერთან შედარებით, რომელიც 511კალორიას და 43 გრ ცხიმს შეიცავს.
თეთრი პური
იმისათვის, რომ გაიზარდოს მიღებული უჯრედისის რაოდენობა, ბევრი ცდილობს თეთრი პურის შეცვლას ქატოს შემცველი რუხი პურით. 50 გრ თეთი პური შეიცავს 0,8გრ უჯრედისს. იგივე რაოდენობის ქატოიანი პური შეიცავს 2,5 გრ უჯრედისს (ცნობისათვის, უჯრედისის დღიური ნორმაა 18 გრ), რაც ძალიან სასარგებლოა ნაწლავებისათვის. სამაგიეროდ, თეთრი პური აღემატება პურის სხვა სახეობებს მინერალების შემცველობით. მაგ. დიდ ბრიტანეთში თეთრი პურის გამოსაცხობად გამიზნულ ფქვილს ამატებენ კალციუმს, რკინას, В ჯგუფის ვიტამინებს, ნიკოტინის მჟავას. საინტერესოა, რომ ვინაიდან თეთრი პური ნაკლებ უჯრედისს შეიცავს, ხოლო უჯრედისი ხელს უშლის კალციუმის შეწოვას, ორგანიზმი თეთრი პურის მიღებისას მეტ კალციუმს შეითვისებს, ვიდრე სხვა შემთხვევაში, ანუ ამას გარკვეული დიეტური მნიშვნელობაც აქვს.
ნაღების კარაქი
უმრავლესობა ცდილობს რძისაგან შედღვებილი ნამდვილი კარაქი შეცვალოს მრეწველობის მიერ სხვადასხვა ცხიმის ნარევისაგან დამზადებული მარგარინის კონსისტენციის კარაქით. რასაკვირველია, ამას აზრი აქვს მაღალი ქოლესტერინის შემთხვევაში. ამავე დროს, 10 გრ ნაღების კარაქი, რომელიც სავსებით საკმარისია 2 ნაჭერ პურზე თხლად გადასასმელად, შეიცავს 8 გრ ცხიმს, რომელთაგანაც 5გრ ნაჯერია. ეს ცხიმის დღიური ნორმის მეოთხედია ქალებში და მეექვსედი - მამაკაცებში. გარდა ამისა, კარაქი არის ერთ-ერთი იმ მცირერიცხოვან პროდუქტთაგანი, რომელიც შეიცავს D ვიტამინს. მუქი ყვითელი ფერის კარაქი, რომელსაც ამზადებენ ბალახზე გაზრდილი და არა თივით ნაკვები ძროხების რძისაგან, შეიცავს ანტიოქსიდანტ ბეტა კაროტინს, რომელიც სასარგებლოა ფილტვებისა და გულისათვის.
მწვადი
მწვადი ხშირად განიხილება უარყოფით კონტექსტში, როგორც ჟანსაღი კვებისათვის მიუღებელი პროდუქტი. ამავე დროს მწვადი წარმოადგენს ერთ-ერთ ყველაზე ჯანმრთელ საკვებს სწრაფი კვების რესტორნების მენიუში. ცხვრის ხორცის მწვადის სტანდარტულ პორცია შეიცავს 232 კალორიას და 6 გრ ცხიმს, რაც ნაკლებია, ვიდრე ქათმის ხორცისაგან დამზადებული მწვადის იგივე პორცია, რომ აღარაფერი ვთქვათ სასარგებლო მინერალებისა და რკინის შემცველობაზე. თუკი დამატებით შეუკვეთავთ სალათის პორციასაც, შეგიძლიათ ჩათვალოთ, რომ შეასრულეთ პროგრამა - ”5 სახის ხილი ან ბოსტნეული დღეში”. თუმცა, გაითვალისწინეთ, რომ ნივრიან სოუსს, რომელსაც მწვადთან ერთად მოგართმევენ რესტორანში, შეუძლია სულ გააფუჭოს საქმე. როგორც წესი ეს სხვა არაფერია, თუ არა ნივრიანი მაიონეზი, რომელიც ერთი სადილის კოვზის ოდენობით შეიცავს 207 კალორიას და 22 გრ ცხიმს (შესადარებლად, სტანდარტული ჰამბურგერი ”მაკდონალდსიდან” შეიცავს 250 კალორიას და 8 გრ ცხიმს).
http://Inopressa.ru
2008.04.15
