აშშ მეცნიერთა ჯგუფმა დაამტკიცა, რომ ერთი კვერცხუჯრედიდან განვითარებული ტყუპების დნმ მნიშვნელოვნად განსხვავდება ერთმანეთისგან. ეს აღმოჩენა კითხვის ნიშნის ქვეშ სვამს ერთ-ერთი ძალზე პოპულარული გენეტიკური მეთოდის – ტყუპების მეთოდის გამოყენებას დიაგნოსტიკურ მედიცინაში, წერს Cnews.ru.
ტყუპების მეთოდი, რომელიც ჯერ კიდევ მე-19 საუკუნეში იყო ცნობილი, ემსახურება გენეტიკური ფაქტორების გავლენის დადგენას ამა თუ იმ დაავადების განვითარებაზე. მეთოდი დამყარებულია იმაზე, რომ მონოზიგოტურ (ერთი კვერცხუჯრედიდან განვითარებულ) ტყუპებს ერთი გენოტიპი უნდა ჰქონდეთ. თუმცა, კვლევა, რომელიც ახლახანს გამოქვეყნდა ჟურნალში “American Journal of Human Genetics”, უარყოფს ამ მოსაზრებას.
ალაბამას უნივერსიტეტისა და აშშ-ში მდებარე სხვა სამეცნიერო დაწესებულებების მეცნიერთა ჯგუფმა ჩაატარა დნმ-ის ანალიზი 19 წყვილ მონოზიგოტურ ტყუპზე, რომლებსაც ჰქონდათ როგორც მსგავსი, ასევე განსხვავებული ფენოტიპი. მეცნიერებმა აღმოაჩინეს მნიშვნელოვანი განსხვავება. დადგინდა, რომ ტყუპების დნმ-ს გააჩნია ვარიაციები ერთი და იგივე გენების ასლებში.
ეს ვარიაციები გამოხატულია გარკვეულ ნუკლეოტიდურ თანმიმდევრობებში. მათი არსებობა ასოცირდება სხვადასხვა დაავადებების, მათ შორის კიბოს განვითარებასთან.
ხშირად მედიკოსები რომელიმე მემკვიდრეობით დაავადებას ადგენენ მონოზიგოტური ტყუპების მხოლოდ ერთი წარმომადგენლის შესწავლის საფუძველზე. ადრე ამას ხსნიდნენ ეკოლოგიური ფაქტორებით, მაგრამ ახალი კვლევის შედეგები სხვა რამეზე მეტყველებს. ამიერიდან ყურადღება უნდა გამახვილდეს მონოზიგოტური ტყუპების გენეტიკურ განსხვავებებზე.
http://www.medinfo.ru
2008.02.26
