რამდენიმე დღის წინ ბოსტონში დასრულდა მე-15 კონფერენცია, მიძღვნილი თემაზე: რეტროვირუსები და ოპორტუნისტული ინფექციები, რომელზეც წარმოდგენილ იქნა აივ-ის მკურნალობისა და პროფილაქტიკის სფეროში არსებული ბოლო მიღწევები. კერძოდ, მეცნიერებმა წარმოადგინეს ხანგრძლივი მოქმედების პრეპარატების შემუშავების ახალი გზა ნანოტექნოლოგიების დახმარებით.
ამჟამად აივ-ის საწინააღმდეგო თერაპია მოიცავს 3-4 პრეპარატის მიღებას, დღეში 1-3ჯერ. ნანოტექნოლოგიურ საფუძველზე შექმნილი პრეპარატების მიღება კი საჭირო იქნება მხოლოდ რამდენიმე თვეში ერთხელ.
ნანონაწილაკები – ეს მიკროსკოპული პოლიმერებია, რომლებიც გამოიყენება სხვადასხვა სფეროში, მათ შორის მედიცინაში. კიბოს წინააღმდეგ ბრძოლის სფეროში, მეცნიერები ცდილობენ ისეთი ნანოტექნოლოგიების გამოყენებას, რომელთა დახმარებითაც ქიმიოთერაპია უშუალოდ სიმსივნეზე იქნება მიზანმიმართული. ეს კი, თავის მხრივ, მინიმუმამდე დაიყვანს გვერდით ეფექტებს. აივ-ის საწინააღმდეგო თერაპიის დროს, ნანონაწილაკების დახმარებით სამკურნალო მედიკამენტის შეყვანა ორგანიზმში უნდა მოხდეს ძალზე მცირე დოზებით.
ბიოტექნოლოგიური კომპანია ტიბორეკის მეცნიერებმა კონფერენციაზე წარმოადგინეს კვლევის შედეგები, რომლის დროსაც ნანონაწილაკები გამოყენებულ იქნა აივ-ის საწინააღმდეგო ახალ პრეპარატ – რილპივირინთან ერთად. ცდები ჩატარებულ იქნა როგორც ცხოველებზე, ისე ადამიანებზე. ეს პრეპარატი ორგანიზმში შეყავთ ან კანქვეშ, ან კუნთში. ნანონაწილაკებიც, შესაბამისად ინერგება კანქვეშ ან კუნთში. სადაც ისინი იწყებენ ნელ-ნელა დაშლას, ხდება რა სამკურნალო საშუალების თანდათანობითი შეწოვა სისხლში.
აღმოჩნდა, რომ ადამიანების სისხლში პრეპარატის დონე შენარჩუნდა 14 დღის განმავლობაში, მაშინ როცა, ცხოველებში ეს 3 თვემდე გაგრძელდა.
მეცნიერები აგრძელებენ კვლევებს ამ მიმართულებით. ფარმკომპანია ასევე გეგმავს გამოიყენოს ნანონაწილაკები აივ-ინფექციის სამკურნალო პრეპარატებთან ერთად შიდსის პროფილაქტიკის სფეროშიც. წარმატების შემთხვევაში, ასეთი პრეპარატის ერთი ინექცია რამდენიმე კვირაში ერთხელ ხელს შეუშლის ვირუსის ადამიანიდან ადამიანზე გადაცემას.
ტიბოტეკი წარმოადგენს ერთადერთ ფარმკომპანიას, რომელიც აპირებს ნანოტექნოლოგიების გამოყენებას აივ-ინფექციის მკურნალობის სფეროში.
http://www.aids.ru
2008.02.25
