ჰარვარდის სამედიცინო სკოლის მკვლევარებმა მოახდინეს იმ 273 ცილის იდენტიფიკაცია, რომელსაც გამოიყენებს იმუნოდეფიციტის ვირუსი ადამიანის ორგანიზმში გამრავლებისათვის. მათი უმრავლესობის როლი ადამიანის იმუნოდეფიციტის ვირუსის სასიცოცხლო ციკლში პირველად იქნა გამოვლენილი. ამერიკელი მკვლევარების აზრით, მათი მუშაობის შედეგები დროთა განმავლობაში მიგვიყვანს აივ-ინფექციის წინააღმდეგ ბრძოლის პრინციპულად ახალი მეთოდების განვითარებამდე.
იმუნოდეფიციტის ვირუსის გენომი შეიცავს მხოლოდ ცხრა გენს, რომლებიც ახდენენ ვირუსის 15 ცილის კოდირებას. რეპლიკაციისათვის აუცილებელ ყველა დანაჩენ ცილას ვირუსი სესხულობს დასნებოვნებული ორგანიზმის უჯრედებისაგან. უკანასკნელი 20 წლის განმავლობაში მეცნიერებმა შეძლეს განესაზღვრათ ათეულობით ასეთი ცილა, თუმცა ახალი კვლევის შედეგებმა მათი რიცხვი ოთხჯერ გაზარდა.
იმისათვის რომ გამოერკვიათ ადამიანის ამა თუ იმ ცილის როლი ვირუსის სასიცოცხლო ციკლში, მეცნიერებმა გამორთეს მისი მაკოდირებელი გენები უჯრედების კოლონიებში, რისთვისაც გამოიყენეს რნმ-ინტერფერენციის მეთოდი. ამის შემდეგ უჯრედებს ასნებოვნებდნენ ადამიანის იმუნიდეფიციტის ვირუსით. რეპლიკაციის არარსებობა ნიშნავდა, რომ გამორთული ცილა როგორღაც მონაწილეობდა ამ პროცესში.
როგორც აღმოჩნდა, იმუნოდეფიციტის ვირუსის მიერ გამოყენებული ცილები ასრულებენ უჯრედში საკმაოდ მრავალფეროვან ფუნქციებს - დაწყებული საკვები ნივთიერებების ტრანსპორტირებისა და შენახვიდან (გოლჯის კომპლექსის ცილები), დაპროგრამებული უჯრედოვანი კვდომის პროცესის რეგულაციით დამთავრებული.
როგორც კვლევის ავტორი პროფესორი სტეფან ელედჟი (Stephen Elledge) აღნიშნავს, აივ-ინფექციის მკურნალობის თანამედროვე მეთოდები დამყარებულია ადამიანის იმუნოდეფიციტის ვირუსზე პირდაპირი ზემოქმედების განხორციელებაზე, თუმცა, ხშირი მუტაციების წყალობით ვირუსი თანდათანობით მდგრადი ხდება ანტივირუსული პრეპარატების უმრავლესობის მიმართ. ამ პრობლემის გადაჭრა შეუძლია მედიკამენტების ახალ კლასს, რომელიც ზემოქმედებს არა საკუთრივ ვირუსზე, არამედ მის მიერ გამოყენებულ უჯრედულ ცილებზე, რომელთა სტრუქტურაც შედარებით მუდმივია.
კვლევა გამოქვეყნებული იქნა ჟურნალის ”Science” ბოლო ნომერში.
http://Medportal.ru
2008.01.15
