სულ უფრო მეტი დამამტკიცებელი საბუთი არსებობს იმის შესახებ, რომ აივ-ინფექცია ზრდის გულის დაავადებების რისკს ანტირეტროვირუსული მკურნალობის გარეშეც. ახალი მონაცემები, რომლებიც წარმოდგენილ იქნა ჩიკაგოში მიმდინარე 47-ე საერთაშორისო დისციპლინარულ კონფერენციაზე ანტიმიკრობული აგენტების და ქიმიოთერაპიის შესახებ, ხსნიან იმას, თუ რა გზით შეიძლება იყოს დაკავშირებული აივ-ინფექცია გულსისხლძარღვთა დაავადებებთან.
ახლახანს ჩატარდა კვლევა, რომელშიც მონაწილეობას იღებდა აივ-ინფიცირებული და მკურნალობის ქვეშ მყოფი 5472 პაციენტი. აღმოჩნდა, რომ გულსისხლძარღვთა დაავადებების რისკი უფრო მაღალი იყო იმ პაციენტებში, რომლებსაც შეუწყვიტეს ანტირეტროვირუსული მკურნალობა. ასეთი შედეგები მოულოდნელი აღმოჩნდა, ვინაიდან ადრე მეცნიერები ვარაუდობდნენ, რომ სწორედ ანტირეტროვირუსული პრეპარატები ზრდიდნენ გულის დაავადების რისკს, მოქმედებდნენ რა ნივთიერებათა ცვლაზე. მონაცემები იმის შესახებ, რომ სწორედ ადამიანის იმუნოდეფიციტის ვირუსი ზრდის გულის დაავადებების რისკს, გამოქვეყნდა მიმდინარე წლის თებერვალში, თუმცა მეცნიერებს არ გაუკეთებიათ არანაირი ახსნა-განმარტება ამ აღმოჩენაზე.
პაბლო ტეგასმა და მისმა კოლეგებმა სამედიცინო საზოგადოებას წარმოუდგინეს თეორია, რომელიც ხსნის ყოველივე ამას. კვლევა ჩატარდა 47, აივ-დადებით პაციენტში, რომლებიც იტარებდნენ ანტირეტროვირუსულ მკურნალობას. პაციენტთა ნაწილმა დროებით შეწყვიტა მკურნალობის კურსი, ხოლო ნაწილი კი განაგრძობდა მას. მიღებული შედეგების თანახმად, თერაპიის შეწყვეტის შემდეგ სისხლში მცირდება ე.წ. “ცუდი” ქოლესტერინის დონე, რომელიც სახიფათოა სისხლძარღვებისთვის, თუმცა ასევე მცირდება “კარგი” ქოლესტერინის დონეც, რომელიც იცავს სისხლძარღვებს ათეროსკლეროზისგან. გარდა ამისა, ანტირეტროვირუსული თერაპიის შეწყვეტის შედეგად, ადამიანის იმუნოდეფიციტის ვირუსი იწყებს გამრავლებას, ამის გამო კი, სისხლში იზრდება ანთებით პროცესებთან დაკავშირებული ნივთიერებების დონე, რომლებიც დამატებით ზიანს აყენებენ სისხლძარღვებს. მეცნიერების აზრით, ასე აიხსნება ის ფაქტი, თუ რატომ იმატებს გულსისხლძარღვთა დაავადებების რისკი ანტირეტროვირუსული თერაპიის შეწყვეტის შემდეგ.
http://www.aids.ru
2007.09.26
