„მთავრობის ინიციატივითა და ჯანდაცვის სამინისტროს უშუალო მონაწილეობით განხორციელდა ახალი და დღეისთვის ყველაზე იმედისმომცემი მედიკამენტის -  „რემდესივირის“ სწრაფი შემოტანა”, - ამის შესახებ თბილისის ინფექციური საავადმყოფოს დირექტორმა თენგიზ ცერცვაძემ განაცხადა.

ცერცვაძის თქმით, „რემდესივირი“ ფუფუნებაა და ჯერ მხოლოდ ამერიკას აქვს საშუალება, ჰქონდეს ეს მედიკამენტი.

„ბევრი ქვეყანა დგას მედიკამენტის რიგში; ასევე, ბევრი ბიუროკრატიული პროცედურაა გასავლელი. ზოგიერთ შემთხვევაში, ორი თვე სჭირდება წამლის მოწოდებას, თუმცა, აქ გამოინახა მექანიზმები, - 10-14 დღეში მოწოდება განხორციელდება და, დაახლოებით, 25-30 ოქტომბრიდან საქართველოს მოქალაქეებს, რომლებსაც აქვთ კორონავირუსის მძიმე ან კრიტიკული ფორმა, სამკურნალოდ დაემატებათ „რემდესივირი“, ხოლო შედარებით შორეულ მომავალში ხელმისაწვდომი გახდება მონოკლონური ანტისხეულებიც“, – აღნიშნა თენგიზ ცერცვაძემ.