გაერო კორონავირუსთან საბრძოლველად 15 მილიონ დოლარს გამოყოფს.
გაეროს მიერ დაფინანსებული თანხები ჯანმო-სა და გაეროს ბავშვთა ფონდისთვისაა (UNICEF) განკუთვნილი. ის გამოყენებული იქნება რიგი კრიტიკული ამოცანების დასაფინანსებლად, მათ შორის ვირუსის გავრცელების მონიტორინგის, შემთხვევების გამოძიებისა და ეროვნული ლაბორატორიების მუშაობის უზრუნველყოფისთვის.
გრანტი გააუმჯობესებს შემთხვევების მოძიებისა და მათზე რეაგირების ეფექტურობას განსაკუთრებით არასტაბილური ჯანდაცვის სისტემის მქონე ქვეყნებში და ამით მოწყვლადი მოსახლეობის მილიონობით ადამიანს გადაარჩენს.
ორგანიზაცია აცხადებს, რომ პრიორიტეტი განვითარებად ქვეყნებს მიენიჭება და ასევე, იმ ქვეყნებს, სადაც ვირუსის გავრცელების რისკი მაღალია.
ძირითადი მიზანია COVID-19– ის გავრცელების წინააღმდეგ ეპიდზედამხედველობის გაძლიერება, შემთხვევათა დეტალური კვლევა კონტაქტების იდენტიფიცირების მიზნით და ეფექტური ზომების მიღება ინფექციის შემდგომი გავრცელების თავიდან ასაცილებლად.
