შრომის, ჯანმრთელობისა და სოციალური დაცვის სამინისტროში კანის კიბოს სკრინინგ-აქცია გაიმართა. ჯანდაცვის სამინისტროს თანამშრომლებს ფოტოდერმატოლოგიისა და კანის კიბოს ასოციაციის წარმომადგენლებმა კანის კიბოს სამედიცინო გამოკვლევა ჩაუტარეს. აქციის მიზანია კანის სიმსივნის ადრეულ სტადიაში აღმოჩენა და მოსახლეობის ინფორმირება კანის ავთვისებიანი სიმსივნეების განვითარების რისკების, პროფილაქტიკისა და ადრეული ნიშნების შესახებ.
ფოტოდერმატოლოგიისა და კანის კიბოს ასოციაციის ორგანიზებით საქართველოში ყოველწლიურად ტარდება კანის კიბოს საწინააღმდეგო საერთაშორისო კამპანია - "ევრომელანომა". კანის კიბოსა და მელანომაზე დაავადების ადრეული ფორმების გამოვლენის და მკურნალობის შედეგების გაუმჯობესების მიზნით, კამპანიის ფარგლებში, 26 მაისს, დამოუკიდებლობის დღეს, საქართველოს ყველა მოქალაქეს, განსაკუთრებით 35 წლის ზემოთ ადამიანებს, რომლებიც რისკ ჯგუფს განეკუთვნებიან, საშუალება მიეცემა რუსთაველის გამზირზე, ჯანდაცვის სამინისტროსათვის განკუთვნილ ადგილზე უფასოდ ჩაიტარონ კანის სკრინინგის პროცედურა.
ცნობისათვის ჯანდაცვის სამინისტრო წარმოდგენილი იქნება კინო „რუსთაველის" მიმდებარე ტერიტორიაზე.
"ევრომელანომას" ფარგლებში, 18-დან 26 მაისის ჩათვლით, მთელი საქართველოს მასშტაბით ტარდება სკრინინგ აქციები. დამატებითი ინფორმაცის მისაღებად დარეკეთ სამინისტროს ცხელ ხაზზე 15 05.
