ჩინელმა მედიკოსებმა გამოხატეს შეშფოთება აკუპუნქტურის (ნემს-თერაპიის) მოსალოდნელი ინფექციური გართულებების რისკის გამო. სტატია, რომელიც გამოქვეყნდა British Medical Journal-ში, დაიწერა ჰონკონგის უნივერსიტეტის მეცნიერთა ჯგუფის მიერ პატრიკ ვუს (Patrick Woo) ხელმძღვანელობით.
სტატიის ავტორები ეყრდნობიან საერთაშორისო კვლევების მონაცემებს, რომლებშიც აღწერილია აკუპუნქტურის შემდეგ ჩირქოვანი ინფექციებით რბილი ქსოვილების დაინფიცირების 50 შემთხვევაზე მეტი. გარდა ამისა, 1970 წლებიდან მსოფლიოში დარეგისტრირებული იყო В ჰეპატიტის 5 აფეთქება, რომელიც უკავშირდებოდა აკუპუნქტურას და რომლის დროსაც დაინფიცირებულთა რიცხვმა გადააჭარბა 80 ადამიანს.
ჩინელი სპეციალისტების სიტყვებით, 2000 წლებში დაფიქსირებული იყო აკუპუნქტურასთან დაკავშირებული ტუბერკულოზითა და სტაფილოკოკური ინფექციებით დასნებოვნების შემთხვევები. მეცნიერებმა ასევე აღნიშნეს, რომ ამ პროცედურის დროს არსებობს С ჰეპატიტით და აივ-ინფექციით დაინფიცირების საშიშროებაც, თუმცა ამ გზით შიდსის გადადების შემთხვევები კლინიკურ პრაქტიკაში აქამდე არ დაფიქსირებულა.
პროფესორმა ვუმ ხაზი გაუსვა, რომ დაავადებებსა და ჩატარებულ აკუპუნქტურას შორის კავშირი ხშირად თვალსაჩინო არ არის, ვინაიდან მრავალ ინფექციას ხანგრძლივი ინკუბაციური პერიოდი გააჩნია.
მკვლევარები მოუწოდებენ სპეციალისტებს, გამოიჩინონ მომატებული ყურადღება იმ ინფექციების მიმართ, რომლებიც გადაეცემა აკუპუნქტურის დროს და ამ დაავადებათა აფეთქებაზე ეჭვის შემთხვევაში აცნობონ მათ. მეცნიერები ასევე ახსენებენ ექიმებს, ყურადღებით მოეკიდონ ასეპტიკისა და ანტისეპტიკის წესების დაცვას, გამოიყენონ მხოლოდ ერთჯერადი ნემსები და კარგად დაამუშაონ პაციენტების კანი მადეზინფიცირებელი საშუალებებით.
http://medportal.ru
2010.03.24
